বিনামূলীয়া নামভৰুক্তিৰ বাবে অসম চৰকাৰৰ ১০৮ কোটি টকা মঞ্জুৰ

ৰাজ্যৰ উচ্চ শিক্ষাৰ্থীসকলৰ বাবে অসম চৰকাৰে এক গুৰুত্বপূৰ্ণ সিদ্ধান্ত গ্ৰহণ কৰিছে। মঙলবাৰে দিশপুৰৰ লোক সেৱা ভৱনত অনুষ্ঠিত কেবিনেট বৈঠকতে এই গুৰুত্বপূৰ্ণ প্ৰস্তাৱটোত অনুমোদন জনোৱা হয়। মুখ্যমন্ত্ৰী হিমন্ত বিশ্ব শৰ্মাই ঘোষণা কৰা অনুসৰি, ৰাজ্যৰ মহাবিদ্যালয়সমূহত চলিত শিক্ষাবৰ্ষত বিনামূলীয়া নামভৰুক্তিৰ বাবে সৰ্বমুঠ ১০৮.৮১ কোটি টকা ব্যয় কৰা হ'ব।

প্ৰজ্ঞান ভাৰতী আঁচনিৰ অধীনত এই পুঁজি মুকলি কৰি দিয়া হৈছে। ইয়াৰ জৰিয়তে ২০২৬-২৭ শৈক্ষিক বৰ্ষৰ পহিলা বৰ্ষৰ স্নাতক পাঠ্যক্ৰমত নামভৰ্তি কৰিবলগীয়া ১.৫ লাখতকৈ অধিক ছাত্ৰ-ছাত্ৰীক বিনামূলীয়া নামভৰুক্তিৰ সুবিধা প্ৰদান কৰা মহাবিদ্যালয়সমূহলৈ এই ক্ষতিপূৰণ আগবঢ়োৱা হ'ব।

মঙলবাৰে এক সংবাদমেল সম্বোধন কৰি মুখ্যমন্ত্ৰী শৰ্মাই এই কথা প্ৰকাশ কৰে। তেওঁ লগতে কয় যে আৰ্থিক অসচ্ছলতাই যাতে কোনো ছাত্ৰ-ছাত্ৰীৰ উচ্চ শিক্ষা আহৰণৰ ক্ষেত্ৰত বাধা হৈ থিয় দিব নোৱাৰে, তাৰ প্ৰতি লক্ষ্য ৰাখিয়েই চৰকাৰে এই পদক্ষেপ গ্ৰহণ কৰিছে। একে সময়তে বিদ্যালয়সমূহৰ শৈক্ষিক মান উন্নত কৰাৰ বাবেও চৰকাৰে বিভিন্ন আঁচনি হাতত লৈছে বুলি তেওঁ উল্লেখ কৰে।