ডিজিটেল ডেস্কঃ অসমৰ সুসন্তান জনপ্ৰিয় কণ্ঠশিল্পী অংগৰাগ পাপন মহন্ত অসুস্থ। পাপনৰ অসুস্থতাৰ বাতৰিয়ে উদ্বিগ্ন কৰি তুলিছে তেওঁৰ অলেখ অনুৰাগী তথা শুভাকাংক্ষীক। পাপনে এই খবৰ নিজে সদৰী কৰাৰ পাছতে উদ্বিগ্ন হৈ পৰিছে তেওঁৰ অনুৰাগীসকল।
নিশা হঠাৎ অসুস্থ হৈ পৰা পাপনক ভৰ্তি কৰোৱা হয় মুম্বাইৰ কোকিলাবেন ধীৰুভাই আম্বানী হাস্পতালত। কণ্ঠশিল্পীগৰাকী হাস্পতালত চিকিৎসাধীন হোৱাৰ পাছত তেওঁৰ সৈতে নাইট এটেণ্ডেন্ট হিচাপে থাকে ১৩ বছৰীয়া পুত্ৰ পোহৰ।
পুত্ৰক লৈ অংগৰাগ মহন্তই আবেগিক পোষ্ট কৰাৰ লগতে তেওঁৰ স্বাস্থ্যৰ বিষয়েও অৱগত কৰে অনুৰাগীসকলক। পাপনে লিখিছে- ‘‘এই সৰু সৰু যুদ্ধবোৰ আমি সকলোৱে অকলে যুঁজ দিওঁ। ব্যক্তিগতভাৱে এইবোৰ ঘটনা ছ’চিয়েল মিডিয়াত পোষ্ট কৰাটো মোৰ ভাল নালাগে৷ কিন্তু যোৱা নিশাটো ব্যতিক্ৰম আছিল। ১৩ বছৰীয়া মোৰ সৰু ল’ৰাটোৱে প্ৰথমবাৰৰ বাবে হাস্পতালৰ নাইট এটেণ্ডেণ্ট হিচাপে মোৰ কাষত আছিল।’ এয়া এক আৱেগিক মুহূৰ্ত। এই কথা মই মোৰ বন্ধু-বান্ধৱী আৰু শুভাকাংক্ষীসকলৰ সৈতে শ্বেয়াৰ কৰিব বিচাৰিছিলো।’’
পিতৃ খগেন মহন্ত আৰু মাতৃ অৰ্চনা মহন্তক সুঁৱৰি পাপনে আকৌ লিখিছে, ‘‘মোৰ মনত আছে সেই সকলোবোৰ সময়. যেতিয়া মই মোৰ মা-দেউতাৰ বাবে এই কাম কৰিছিলোঁ। ইতিমধ্যে নাতি পোহৰে লোৱা এই দায়িত্ব চাবলৈ তেওঁলোক ওচৰত থকা হ’লে ভাল আছিল!’
!
মই ধন্য অনুভৱ কৰিছো আৰু সকলোৰে আশীৰ্বাদ আৰু শুভেচ্ছাৰ বাবে ধন্যবাদ! এতিয়া মই আগতকৈ সুস্থ অনুভৱ কৰিছো’’
Continue Reading
