ডিজিটেল ডেস্কঃ কাৰ ক'ত মৃত্যু সেয়া কোনেও নাজানে। আনদিনাৰ দৰেই সদায় পুৱা কলেজলৈ বুলি ঘৰৰ পৰা ওলাই অহা এগৰাকী ছাত্ৰীয়ে সাবটিলে মৃত্যুক। এক ভয়ংকৰ পথ দুৰ্ঘটনাত অকাল মৃত্যুক সাৱটিলে এগৰাকী মেডিকেলৰ ছাত্ৰীয়ে।
মঙলবাৰে পুৱা এই শোকাবহ দুৰ্ঘটনা সংঘটিত হয় কেৰালাৰ থিৰুৰকাডৰ ৰাষ্ট্ৰীয় ঘাইপথত। নিহত ছাত্ৰীগৰাকীক আলাপ্পুজাৰ নিৱাসী আলফনছা (২২) বুলি চিনাক্ত কৰা হৈছে। পেৰিন্থালমানাৰ এমইএছ একাডেমী অৱ মেডিকেল ছায়েন্সৰ এমবিবিএছৰ চূড়ান্ত বৰ্ষৰ ছাত্ৰী আছিল মৃত আলফনছা।
.jpg?$p=01b182c&f=16x10&w=852&q=0.8)
মঙলবাৰে পুৱা তেওঁ অশ্বিন(২২)নামৰ এগৰাকী সহপাঠীৰ সৈতে বাইকেৰে কলেজলৈ গৈ থকা সময়তে ৰাষ্ট্ৰীয় ঘাইপথত আন এখন বাইকৰ সৈতে তেওঁলোকৰ মুখামুখি সংঘৰ্ষ ঘটে। এই সংঘৰ্ষ ইমানেই ভয়ংকৰ আছিল যে আলফনছাৰ থিতাতে মৃত্যু ঘটে। দুৰ্ঘটনাটোত গুৰুতৰভাৱে আহত হয় অশ্বিন।
পাছত ঘটনাস্থলীত আৰক্ষীৰ দল উপস্থিত হৈ গুৰুতৰভাৱে আহত অশ্বিনক হাস্পতালত ভৰ্তি কৰায় আৰু আলফনছাৰ মৃতদেহ চমজি লৈ মৰণোত্তৰ পৰীক্ষাৰ বাবে প্ৰেৰণ কৰে। পেৰিন্থালমানাৰ চৰকাৰী জিলা চিকিৎসালয়ত মৰণোত্তৰ পৰীক্ষাৰ পাছত আলফনছাৰ মৃতদেহ আলফনছাৰ পৰিয়ালক গতাই দিয়া হয়। এই ঘটনাই সমগ্ৰ অঞ্চলজুৰি গভীৰ শোকৰ ছাঁ পেলাইছে।
Continue Reading
