ডিজিটেল ডেস্কঃ দুখন ৰাজ্যৰ বিধানসভা নিৰ্বাচনৰ দিন সামা্য সলনি কৰা হৈছে। অৰুণাচল প্ৰদেশ আৰু ছিকিম বিধানসভা নিৰ্বাচনৰ বাবে ভোট গণনাৰ তাৰিখ সংশোধন কৰিলে নিৰ্বাচন আয়োগে। কেন্দ্ৰীয় নিৰ্বাচন আয়োগে দেওবাৰে ঘোষণা কৰা অনুসৰি অৰুণাচল প্ৰদেশ আৰু ছিকিমৰ বিধানসভাৰ ভোট গণনাৰ তাৰিখ পূৰ্বৰ ৪ জুনৰ পৰিৱৰ্তে ২ জুন হিচাবে সংশোধন কৰা হৈছে।
এই ৰাজ্য দুখনত ভোটদান ১৯ এপ্ৰিলত অনুষ্ঠিত হ’ব ৷ নিৰ্বাচন আয়োগৰ মতে ভোট গণনাৰ তাৰিখ সংশোধন কৰাৰ সিদ্ধান্ত এইবাবেই লোৱা হৈছে যে ২ জুন, ২০২৪ তাৰিখে অৰুণাচল প্ৰদেশ আৰু ছিকিম দুয়োখন বিধানসভাৰ ম্যাদ উকলি যাব। সেইবাবেই ২ জুনতেই দুয়োখন ৰাজ্যৰ বিধানসভা নিৰ্বাচনৰ ভোট গণনা কৰা হ’ব।
নিৰ্বাচন আয়োগে কয়, "... অৰুণাচল আৰু ছিকিম দুয়োখন বিধানসভাৰ সদনৰ কাৰ্যকালৰ ম্যাদ ২ জুন, ২০২৪ তাৰিখে শেষ হ'ব। ইয়াৰ পৰিপ্ৰেক্ষিতত আয়োগে অৰুণাচল প্ৰদেশ আৰু ছিকিমৰ বিধান সভাসমূহৰ সাধাৰণ নিৰ্বাচনৰ সময়সূচীৰ সন্দৰ্ভত তাৰিখৰ সংশোধন কৰাৰ সিদ্ধান্ত লৈছে।" মন কৰিবলগীয়া যে দুয়োখন ৰাজ্যৰ লোকসভা নিৰ্বাচনৰ ভোটগণনা আৰম্ভণিতে উল্লেখ কৰা ধৰণেই ৪ জুনতেই অনুষ্ঠিত হ’ব ৷
ইয়াৰ পূৰ্বে, ১৬ মাৰ্চ, শনিবাৰে নিৰ্বাচন আয়োগে ঘোষণা কৰিছিল যে অৰুণাচল প্ৰদেশত লোকসভা আৰু ৰাজ্যিক বিধানসভা দুয়োটাৰ বাবে ১৯ এপ্ৰিল, ২০২৪ তাৰিখে নিৰ্বাচন অনুষ্ঠিত হ'ব৷ অৰুণাচল প্ৰদেশত দুখন লোকসভা আসন আৰু ৬০ টা বিধানসভা সমষ্টি আছে। ইয়াৰে ৫৩ খন অনুসূচীত জনজাতি (এছটি) প্ৰাৰ্থীৰ বাবে সংৰক্ষিত আৰু বাকীবোৰ সাধাৰণ শ্ৰেণীৰ আসন।
Continue Reading
