ডিজিটেল ডেস্কঃ অসমৰ চুবুৰীয়া ৰাজ্য অৰুণাচল প্ৰদেশত শুকুৰবাৰে নিশা ভয়ংকৰ ভূমিস্খলন হয়। এই ভয়ংকৰ ভূমিস্খলনত অসমৰ কমেও চাৰিজন শ্ৰমিকৰ মৃত্যু হোৱাৰ খবৰ আহিছে।
জানিব পৰা মতে, অৰুণাচল প্ৰদেশৰ আপাৰ ছিয়াং জিলাত সংঘটিত হৈছে এই ভূমিস্খলনৰ ঘটনা। ইংকিয়াং- টুটিং ৰোডৰ মচিং গাঁৱত হোৱা এক বৃহৎ ভূমিস্খলনৰ ফলত অসমৰ ৪ জন পথ নিৰ্মাণকৰ্মীৰ মৃত্যু হয়। শোকাৱহ ঘটনাটোত প্ৰাণ হেৰুওৱা শ্ৰমিক কেইজন পথ নিৰ্মাণৰ কামত নিয়োজিত হৈ আছিল।
ভূমিস্খলনৰ ঘটনাটো ইমানেই ভয়ংকৰ আছিল যে শ্ৰমিক কেইজন জীৱন্তে সমাধিস্থ হয়। এতিয়ালৈকে মৃত শ্ৰমিক কেইজনৰ পৰিচয় জানিব পৰা হোৱা নাই। ভূমিস্খলন হোৱাৰ সময়ত শ্ৰমিকসকলে পথৰ কাষৰ অস্থায়ী কেম্পত শুই আছিল।
উল্লেখ্য যে, বিগত পাঁচদিন ধৰি হৈ থকা নেৰা নেপেৰা বৰষুণৰ বাবেই এই ভয়ংকৰ ভূমিস্খলনৰ ঘটনাটো সংঘটিত হোৱা বুলি অনুমান কৰা হৈছে। অঞ্চলটোত বিগত পাঁচ দিন ধৰি নেৰেনেপেৰা বৰষুণ হৈ আছিল যাৰ বাবে টুটিং অঞ্চলৰ বহিঃজগতৰ লগত যোগাযোগ বিচ্ছিন্ন হৈ আছে।
Continue Reading
