ডিজিটেল ডেস্কঃ বলীউডৰ মহানায়ক অমিতাভ বচ্চনক এজন লোকে ক’লে যে আপোনাৰ পুত্ৰ অভিষেক বচ্চন আপোনাতকৈ ভাল অভিনেতা। বলীউডৰ এজন ফ্লপ অভিনেতা হিচাপে অভিষেক বচ্চনক জনা যায় তেনেস্থলত কোনে কলে যে মেগাষ্টাৰ অমিতাভ বচ্চনতকৈ অভিষেক বেছি ভাল অভিনেতা। 'কৌন বনেগা কৰোড়পতি’ ১৪ৰ শেষৰ খণ্ডটোত এজন প্ৰতিযোগীয়ে অমিতাভ বচ্চনক কৈছিল এই কথা। অমিতাভে এই কথা শুনি আনন্দিত হৈ পৰিছিল।
প্ৰতিযোগীগৰাকীৰ নাম ৰূপিন শৰ্মা। বিগ বিয়ে তেওঁৰ শ্ব’ত ৰূপিন শৰ্মাক উষ্ম আদৰণি জনায়। ৰূপিন শৰ্মা নাগালেণ্ডৰ ডিজিপি (ডাইৰেক্টৰ জেনেৰেল প্ৰিজনছ)। ৰূপিন শৰ্মাক অমিতাভ বচ্চনে ছাৰ বুলি সম্বোধন কৰিছিল। অমিতাভ বচ্চনে এটা ভিডিঅ’ বজাইছিল, য’ত ৰূপিন শৰ্মাৰ চমু পৰিচয় দিয়া হৈছিল। নাগালেণ্ডৰ লোকসকলে ৰূপিন শৰ্মাৰ কৰ্ম আৰু সামাজিক পদক্ষেপৰ শলাগ লোৱা দেখা যায়। ভিডিঅ’টো চোৱাৰ পিছত শৰ্মাই আপাত দৃষ্টিত আৱেগিক হৈ পৰাৰ লগতে তেওঁক ইমান মৰম দিয়াৰ বাবে সকলোকে ধন্যবাদ জ্ঞাপন কৰে।
শ্ব' চলি থকাৰ মাজতে ৰূপিন শৰ্মাই অমিতাভ বচ্চনক কয় যে “মই শেহতীয়াকৈ অভিষেক বচ্চনৰ দশৱী খন চালো। ছাৰ মই আপোনাক এটা কথা ক'ব বিচাৰো। হয়তো আপুনি এই কথা শুনি বেয়া পাবও পাৰে কিন্তু মই ভাবো যে এয়া আপোনাৰ বাবে এক গৌৰৱৰ মুহূৰ্তহে হ'ব। মই ভাবো যে অভিষেক আপোনাতকৈ ভাল অভিনেতা।” অমিতাভে এই কথা শুনি ক’লে “আপুনি একদম ঠিক কথা কৈছে ছাৰ। বহুত বহুত ধন্যবাদ ছাৰ। অভিষেকে এই কথা শুনি বহুত সুখী হ’ব।”
ৰূপিন শৰ্মা আৰু অমিতাভ বচ্চনৰ এই কথা-বতৰা বৰ্তমান ভাইৰেল হৈ পৰিছে।
Continue Reading
