ডিজিটেল ডেস্কঃ শনিবাৰে (৩০ ডিচেম্বৰ) উত্তৰ প্ৰদেশৰ অযোধ্যা চহৰ ভ্ৰমণ কৰিবলৈ গৈ আছে প্ৰধানমন্ত্ৰী নৰেন্দ্ৰ মোদী। এই ভ্ৰমণত প্ৰধানমন্ত্ৰী মোদীয়ে অযোধ্যাক ১৫,৭০০ কোটি টকা উপহাৰ দিবলৈ ওলাইছে। ইয়াৰ ভিতৰত মৰ্যাদা পুৰুষোত্তম শ্ৰীৰাম আন্তঃৰাষ্ট্ৰীয় বিমানবন্দৰ আৰু অযোধ্যাৰ অযোধ্যা ৰেলৱে ষ্টেচনৰ পুনৰ উন্নয়ন অন্তৰ্ভুক্ত। ইয়াৰ উপৰিও প্ৰধানমন্ত্ৰীয়ে দুখন নতুন অমৃত ভাৰত আৰু ছখন নতুন বন্দে ভাৰত ৰে’লৰ ফ্লেগ অফ কৰিব। প্ৰধানমন্ত্ৰীৰ কাৰ্যালয়ে এই তথ্য প্ৰদান কৰিছে।
ইয়াৰ পাছত প্ৰধানমন্ত্ৰীয়ে ৰাজহুৱা কাৰ্যসূচীত অংশগ্ৰহণ কৰিব, য’ত প্ৰধানমন্ত্ৰী মোদীয়ে ৰাজ্যখনৰ ১৫,৭০০ কোটিতকৈ অধিক টকাৰ কেইবাটাও উন্নয়নমূলক প্ৰকল্পৰ উদ্বোধন আৰু আধাৰশিলা স্থাপন কৰিব। ইয়াৰ ভিতৰত অযোধ্যা আৰু ইয়াৰ আশে-পাশে থকা অঞ্চলৰ উন্নয়নৰ বাবে প্ৰায় ১১,১০০ কোটি টকাৰ প্ৰকল্প আৰু সমগ্ৰ উত্তৰ প্ৰদেশৰ অন্যান্য প্ৰকল্পৰ সৈতে জড়িত প্ৰায় ৪৬০০ কোটি টকাৰ প্ৰকল্প।
পিএমঅ’ই কয় যে ইয়াৰ উপৰিও বহু নতুন প্ৰকল্পৰ আধাৰশিলা স্থাপন কৰা হ’ব, যিয়ে অযোধ্যা আৰু ইয়াৰ আশে-পাশে নাগৰিকৰ সুবিধাসমূহৰ সৌন্দৰ্য আৰু উন্নতিত অৰিহণা যোগাব। বিবৃতিটোত কোৱা হৈছে যে অযোধ্যাৰ অত্যাধুনিক বিমানবন্দৰৰ প্ৰথম পৰ্যায়ত ১৪৫০ কোটিতকৈ অধিক ব্যয় সাপেক্ষে নিৰ্মাণ কৰা হৈছে। বিমানবন্দৰৰ টাৰ্মিনেল ভৱনটোৰ আয়তন ৬৫০০ বৰ্গমিটাৰ হ’ব, যিটো বিমানবন্দৰে বছৰি প্ৰায় ১০ লাখ যাত্ৰীক সেৱা আগবঢ়াবলৈ সাজু হ’ব।
বিমানবন্দৰৰ টাৰ্মিনেল ভৱনৰ মুখাৱয়বত অযোধ্যাৰশ্ৰী ৰাম মন্দিৰৰ স্থাপত্য প্ৰতিফলিত হৈছে। টাৰ্মিনেল ভৱনৰ ভিতৰৰ অংশ স্থানীয় শিল্প, চিত্ৰ আৰু ভগৱান শ্ৰীৰামৰ জীৱন চিত্ৰিত মিউৰেলেৰে সজাই তোলা হৈছে। অযোধ্যা বিমানবন্দৰৰ টাৰ্মিনেল ভৱনত বিভিন্ন সা-সুবিধা আছে যাৰ ভিতৰত আছে ইনচুলেটেড ছাদ ব্যৱস্থা, এল ই ডি লাইটিং, বৰষুণৰ পানী সংগ্ৰহ, ফোয়াৰাৰে লেণ্ডস্কেপিং, পানী পৰিশোধন প্লাণ্ট, নলা পৰিশোধন প্লাণ্ট, সৌৰ শক্তি কেন্দ্ৰ অন্যতম।
উল্লেখ্য যে দেশৰ নতুন শ্ৰেণীৰ ছুপাৰফাষ্ট যাত্ৰীবাহী ৰে’ল ‘অমৃত ভাৰত এক্সপ্ৰেছ’ক ফ্লেগ অফ কৰিব প্ৰধানমন্ত্ৰীয়ে। অমৃত ভাৰত ৰেলখন হৈছে নন এয়াৰ কণ্ডিচনাৰ ডবাযুক্ত এল এইচ বি পুছ পুল ট্ৰেইন। এই ৰেলখনৰ দুয়ো মূৰত ল’কো আছে যাতে উন্নত ত্বৰণ হয়। এই ৰেলৱেই যাত্ৰীসকলক সুন্দৰ আৰু আকৰ্ষণীয় ডিজাইনৰ আসন, উন্নত লাগেজ ৰেক, উপযুক্ত মোবাইল হোল্ডাৰৰ সৈতে মোবাইল চাৰ্জিং পইণ্ট, এল ই ডি লাইট, চি চি টি ভি, ৰাজহুৱা তথ্য ব্যৱস্থা আদি উন্নত সুবিধা প্ৰদান কৰে।
প্ৰধানমন্ত্ৰীয়ে অমৃত ভাৰতৰ দুখন নতুন ৰে’ল, দৰভংগা-অযোধ্যা-আনন্দ বিহাৰ টাৰ্মিনেল অমৃত ভাৰত এক্সপ্ৰেছ আৰু মালদাহ টাউন-ছাৰ এম বিশ্বেশ্বৰায় টাৰ্মিনাছ (বেংগালুৰু) অমৃত ভাৰত এক্সপ্ৰেছক ফ্লেগ অফ কৰিব। এই উপলক্ষে প্ৰধানমন্ত্ৰীয়ে ছখন নতুন বন্দে ভাৰত ৰে’লকো ফ্লেগ অফ কৰিব। ইয়াৰ ভিতৰত শ্ৰী মাতা বৈষ্ণো দেৱী কাতৰা-নতুন দিল্লী বন্দে ভাৰত এক্সপ্ৰেছ, অমৃতসৰ-দিল্লী বন্দে ভাৰত এক্সপ্ৰেছ, কইম্বাটুৰ-বাংগালুৰু কণ্ট বন্দে ভাৰত এক্সপ্ৰেছ, মঙলদৈ-মদগাঁও বন্দে ভাৰত এক্সপ্ৰেছ, জালনা-মুম্বাই বন্দে ভাৰত এক্সপ্ৰেছ আৰু অযোধ্যা-আনন্দ বিহাৰ টাৰ্মিনেল বন্দে ভাৰত এক্সপ্ৰেছ অন্তৰ্ভুক্ত কৰা হৈছে।
প্ৰধানমন্ত্ৰীয়ে অঞ্চলটোৰ ৰে’ল আন্তঃগাঁথনি শক্তিশালী কৰাৰ বাবে ২৩০০ কোটি টকাৰ তিনিটা ৰে’ল প্ৰকল্পও দেশৰ বাবে উৎসৰ্গা কৰিব। এই প্ৰকল্পসমূহৰ ভিতৰত ৰুমা চাকেৰী-চাণ্ডেৰী থাৰ্ড লাইন প্ৰকল্প। শ্ৰী ৰাম মন্দিৰৰ প্ৰৱেশ বৃদ্ধিৰ বাবে প্ৰধানমন্ত্ৰীয়ে অযোধ্যাত চাৰিটা নতুনকৈ উন্নীত, বহল আৰু সৌন্দৰ্যবৰ্ধন কৰা পথ উদ্বোধন কৰিব। পথকেইটাৰ নাম ক্ৰমে ৰামপথ, ভক্তিপথ, ধৰ্মপথ আৰু শ্ৰী ৰাম জন্মভূমি পথ।
Continue Reading
