ডিজিটেল ডেস্কঃ প্ৰভু ৰামৰ জন্মনগৰী অযোধ্যাত আছে এজোপা অলৌকিক গছ। গছজোপাত আচৰিত ধৰণে নিজে নিজে খোদিত হয় এটা শব্দ। সেই শব্দটো হৈছে 'ৰাম'। সেয়েহে এই গছজোপা 'ৰামনাম' নামেৰে পৰিচিত। কদম প্ৰজাতিৰ এই গছজোপাক সেয়ে সকলোৱে পূজা কৰে।
অযোধ্যাৰ তকপূৰা গাঁৱত থকা ৰামনাম গছজোপা সকলোৰে বিশ্বাসৰ কেন্দ্ৰবিন্দু। ৩০ বছৰ ধৰি কদম প্ৰজাতিৰ এই গছজোপাৰ গা-গছ, কাণ্ড, ডাল আদিত নিজে নিজে ৰামৰ নাম খোদিত হৈ আছে। এগৰাকী সাধুৱে সপোনত দেখি এই গছজোপা আৱিষ্কাৰ কৰিছিল।
উল্লেখ্য যে সময়ৰ লগে লগে ৰামৰ নামৰ সংখ্যা বাঢ়ি গৈ আছে গছজোপাত। ইয়াৰ আশে-পাশে থকা মানুহে যেতিয়া এই গছজোপাৰ অলৌকিকতাৰ কথা জানিব পাৰিলে, তেতিয়া তেওঁলোকে এই গছজোপাক নিতৌ পূজা কৰিবলৈ ধৰিলে।
বছৰত এবাৰ এই গছজোপাৰ তলত বিশাল মেলাৰ আয়োজন কৰা হয়। ইয়াত অংশগ্ৰহণ কৰিবলৈ দেশৰ চুকে-কোণে থকা বহু ভক্ত ঢপলিয়াই আহে। বিশ্বাস কৰা হয় যে এই গছজোপা পূজা কৰা ব্যক্তিজনৰ সকলো শাৰীৰিক, মানসিক আৰু আৰ্থিক অসুবিধা নোহোৱা হৈ যায় আৰু তেওঁ সুখী জীৱন যাপন কৰে। প্ৰায় ত্ৰিশ বছৰ আগতে এনে এজোপা গছ আছিল প্ৰাচীন আৰু ঐতিহাসিক মণি পৰ্বতৰ ওচৰত। যিজোপা শুকাই গ’ল। এই একে ধৰণৰ গছ পুনৰ নিজাববীয়াকৈ গজি উঠিছে অযোধ্যাৰ তকপূৰা গাঁৱত।
ভিএইচপিৰ কেন্দ্ৰীয় ব্যৱস্থাপনা সমিতিৰ সদস্য পুৰুষোত্তম নাৰায়ণ সিঙে এনে দুষ্প্ৰাপ্য গছক শুভ বুলি অভিহিত কৰি কয় যে ''যিসকলে ভগৱান শ্ৰীৰামক কাল্পনিক বুলি অভিহিত কৰি আহিছে, তেওঁলোকে পবিত্ৰ অযোধ্যা ভূমিলৈ আহি এই অলৌকিক গছজোপা চাই যাবহি লাগে।''
উত্তৰ প্ৰদেশৰ ৰাজনৈতিক নেতা কেশৱ প্ৰসাদ মৌৰ্যই ইয়াক ভগৱানে দিয়া অলৌকিক উপহাৰ বুলি অভিহিত কৰিছে। তেওঁৰ মতে ভাৰতৰ ভূমি বহু অলৌকিকতাৰে ভৰি আছে।
গাঁওবাসীয়ে এই গছজোপাক অতিশয় সন্মান আৰু ভক্তি কৰে।এই গছজোপাক শ্ৰীৰামৰ প্ৰতীক বুলি গণ্য কৰি নিয়মিতভাৱে পূজা কৰা হয়। এই গছজোপাৰ ডাল-পাত কোনেও নিছিঙে। ইয়াৰ চৌপাশে বান্দৰ আছে যদিও কেতিয়াও গছজোপাত বান্দৰ নুঠে। আগতে গছজোপাৰ চাৰিওফালে এখন হাবি আছিল। অৰ্জুন বাবা নামৰ এজন সাধু তালৈ আহি গছজোপাৰ বিষয়ে গাঁওবাসীক অৱগত কৰিলে। তেওঁ আৱিষ্কাৰ কৰা এই অলৌকিক গছজোপাক দূৰ-দূৰণিৰ পৰা আহিও বহু লোকে পূজা সেৱা কৰে।
উল্লেখ্য যে দেশ-বিদেশৰ বহু গৱেষক, বিজ্ঞানী, উদ্ভিদবিদসকলে নানা গৱেষণা কৰাৰ পাছতো গছজোপাত ৰামৰ নাম কেনেকৈ খোদিত হয় তাৰ উত্তৰ বিচাৰি উলিয়াব পৰা নাই। তেওঁলোকে ইয়াক এক চমৎকাৰ বুলি অভিহিত কৰিছে।
Continue Reading
