ডিজিটেল ডেস্ক: ৰাম মন্দিৰ মুকলিৰ প্ৰাকক্ষণত ৰামনগৰী অযোধ্যাত ব্যাপক প্ৰস্তুতি৷ ২২ জানুৱাৰীত অযোধ্যাত ৰামলালাৰ প্ৰাণ প্ৰতিষ্ঠা অনুষ্ঠান৷ যাক লৈ এতিয়া উদুলি-মুদুলি পৰিৱেশ অযোধ্যাত৷ ২২ জানুৱাৰীৰ পূৰ্বে নৱনিৰ্মিত ৰাম মন্দিৰৰ কাম সম্পূৰ্ণ কৰাৰ কথা ঘোষণা কৰিছে নিৰ্মাণকাৰ্যত জড়িত অভিযন্তাসকলে৷
দেওবাৰৰ পৰা অযোধ্যাত আৰম্ভ হৈছে চাফাই অভিযান৷ উত্তৰ প্ৰদেশৰ মুখ্যমন্ত্ৰী যোগী আদিত্য নাথে শুভাৰম্ভ কৰে চাফাই অভিযানৰ৷ ইপিনে মুকলিৰ প্ৰাকক্ষণত চত্তীশগড়ৰ পৰা অযোধ্যালৈ প্ৰেৰণ কৰা হৈছে ৰামললাৰ বিশেষ সিংহাসনৰ লগতে ২১ কিলোগ্ৰাম ওজনৰ ৰূপৰ সামগ্ৰী৷ আনহাতে বিহাৰৰ মিথিলাৰ পৰা ৰামলালাৰ বাবে প্ৰেৰণ কৰা হৈছে ৰূপৰ বিশেষ বাচন-বৰ্তন৷ ইপিনে নৱনিৰ্মিত ৰাম মন্দিৰক লৈ দেশৰ ভিন্ন প্ৰান্তত ভক্তৰ লগতে আন আন লোকসকলৰ মাজতো বিশেষ উছাহ-উদ্দীপনা৷ গুজৰাট আৰু ৰাজস্থানৰ পৰা পদব্ৰজে অযোধ্যাত উপস্থিত ২ যুৱক৷ ৩৪ দিনত ১৪০০ কিলোমিটাৰ পথ ভ্ৰমণ কৰি অযোধ্যাত উপস্থিত হ’ল যুৱকদ্বয়৷
একেদৰে ইণ্ডোৰৰ পৰা ৰাষ্ট্রীয় পৰ্যায়ৰ এথলীট কাৰ্তিক যোশীয়ে অযোধ্যা অভিমুখে আৰম্ভ কৰিছে ১০০৮ কিলোমিটাৰৰ দৌৰ৷ ১৪ দিনত দৌৰবিদগৰাকীয়ে সম্পূৰ্ণ কৰিব দৌৰ৷ দেওবাৰে অযোধ্যা প্ৰশাসনে লাভ কৰিলে ৫০ খন ই-বাছৰ লগতে ৫০খনকৈ পিংক অ’টোৰিক্সা৷ আনহাতে অযোধ্যাত উপস্থিত হৈছে ৰামায়ণ ধাৰাবাহিকৰ ৰাম খ্যাত অভিনেতা অৰুণ গোভিল৷ প্ৰাণ প্ৰতিষ্ঠা অনুষ্ঠানলৈ নিমন্ত্ৰণ জনোৱা হৈছে বিশ্বৰ ৫৫খন দেশৰ ১০০ গৰাকী অতিথিক৷ তাৰ মাজতে লোকসভাৰ প্ৰাক্তন অধ্যক্ষ মীৰা কুমাৰলৈও প্ৰেৰণ কৰা হ’ল নিমন্ত্ৰণী পত্ৰ৷ বিজেপি নেত্ৰী তথা বিখ্যাত অভিনেত্ৰী হেমা মালিনীয়ে ১৭ জানুৱাৰীত অংশ ল’ব অযোধ্যাৰ নৃত্যানুষ্ঠানত৷
Continue Reading
