ডিজিটেল ডেস্ক: দেশত সম্প্ৰতি নিষিদ্ধ ঘোষিত ড্ৰাগছৰ বিৰুদ্ধে জোৰদাৰ অভিযান আৰম্ভ হৈছে। এই নিচাজাতীয় সামগ্ৰীৰ চোৰাং সৰবৰাহৰ লগত জড়িত চক্ৰসমূহ উৎখাতৰ বাবে অভিযানত নামি পৰিছে দেশৰ নিৰাপত্তা বাহিনী। এই নিষিদ্ধ ঘোষিত সামগ্ৰীসমূহ দেশৰ বাহিৰৰ পৰা দেশৰ সীমাৰ ভিতৰত প্ৰৱেশ কৰে বুলি দীৰ্ঘদিনৰ পৰা চৰ্চা চলি আহিছে।
এই সন্দেহকে বাস্তৱায়িত কৰি বৃহৎ পৰিমাণৰ ড্ৰাগছ পাকিস্তানৰ পৰা সৰবৰাহৰ লগত জড়িত দুগৰাকী ব্যক্তিক গ্ৰেপ্তাৰ কৰা হৈছে। প্ৰায় ৩৮ কিলোগ্ৰাম হিৰ’ইনসহ গ্ৰেপ্তাৰ হোৱা দুয়োগৰাকী ব্যক্তিয়ে পাকিস্তানৰ পৰা ভাৰতলৈ ড্ৰাগছ সৰবৰাহ কৰিছিল বুলি স্বীকাৰ কৰিছে।
যোৱা ২৭ আগষ্টত পঞ্জাৱ আৰক্ষীয়ে ৩৮ কিলোগ্ৰাম হিৰ’ইনসহ এই চোৰাং ব্যৱসায়ী দুগৰাকীক গ্ৰেপ্তাৰ কৰিছিল। গুজৰাটৰ ভুজৰ পৰা পঞ্জাৱ অভিমুখী এখন ট্ৰাকত এই ড্ৰাগছখিনি সৰবৰাহ কৰা হৈছিল।
পঞ্জাৱ আৰক্ষীয়ে ঘটনা সন্দৰ্ভত গুজৰাট সন্ত্ৰাসবাদ বিৰোধী দলৰ (এটিএছ) সৈতে আলোচনা মিলিত হৈছিল। গুজৰাট এটিএছে কচ্ছৰ পৰা দুজন অভিযুক্তক গ্ৰেপ্তাৰ কৰিছিল। দুয়োগৰাকী অভিযুক্তই গুজৰাট এটিএছৰ আগত উল্লেখ কৰা মতে এই ড্ৰাগছখিনি পাকিস্তানৰ গুল মহম্মদৰ পৰা অনা হৈছিল।
ইতিমধ্যে অভিযুক্তসকলক আহমেদাবাদৰ এটিএছ কাৰ্যালয়লৈ পঠোৱা হৈছে আৰু অধিক তদন্তৰ বাবে শীঘ্ৰেই পঞ্জাৱ আৰক্ষীক গতাই দিয়া হ'ব বুলিও আৰক্ষী বিষয়সকলে জানিবলৈ দিয়ে।
Continue Reading
