ডিজিটেল ডেস্কঃ দিল্লীৰ উপ-মুখ্যমন্ত্ৰী মনীষ চিছ’দিয়াক পাঁচ দিন চিবিআইৰ জিম্মাত প্ৰেৰণ কৰা হৈছে। দিল্লীৰ আদালতে কয় যে তেওঁ অহা ৪ মাৰ্চলৈকে চিবিআইৰ জিম্মাত থাকিব। ৮ ঘণ্টাৰ জেৰাৰ অন্তত দেওবাৰে আবকাৰী দুৰ্নীতিৰ গোচৰত গ্ৰেপ্তাৰ কৰা হয় ছিছ’ডিয়াক। সোমবাৰে তেওঁক দিল্লীৰ ৰাউজ এভিনিউ আদালতত হাজিৰ কৰোৱা হয়।
সোমবাৰে আদালতত চিবিআইয়ে দাবী কৰে যে ছিছ’দিয়াই তেওঁলোকৰ কেইবাটাও প্ৰশ্নৰ উত্তৰ দিয়াৰ পৰা বিৰত আছিল। আবকাৰী নীতিৰ প্ৰথম খচৰাত কমেও ৬টাকৈ বিষয়ৰ উত্তৰ দিব পৰা নাছিল। চিবিআইয়ে দাবী কৰে যে আবকাৰী নীতিৰ পৰিৱৰ্তন পানীয় বিক্ৰী কৰা কোম্পানীসমূহৰ স্বাৰ্থত কৰা হৈছে। বিনিময়ত ১০০ কোটি টকা লোৱা হৈছে।
চিছ’দিয়াৰ কম্পিউটাৰৰ পৰা আবকাৰী নীতিৰ খচৰা সন্দৰ্ভত এখন টোকা উদ্ধাৰ কৰা বুলিও দাবী কৰে চিবিআইয়ে। তদন্তকাৰীৰ মতে, ছিছ’দিয়াই আবকাৰী আয়ুক্তক এই নোটখন দিছিল। অৱশ্যে তেওঁৰ আইনী উপদেষ্টাসকলৰ লগত দিয়া পৰামৰ্শৰ সেই অংশটো তেওঁ এৰি দিলে।
চিবিআইৰ এই সকলো অভিযোগ মানি লোৱা নাই ছিছ’দিয়াৰ অধিবক্তাই। তেওঁ ক’লে, “মোৰ ক্লায়েণ্টে তেওঁলোকৰ অভিযোগ মানি লোৱা নাই। সেইটোৱেই তেওঁলোকৰ সমস্যা। তেওঁক জিম্মালৈ পঠিয়াব নোৱাৰি কাৰণ কোনেও অপৰাধ স্বীকাৰ কৰা নাই।’’
ইফালে, দেশৰ বিভিন্ন প্ৰান্তত দিল্লীৰ উপ-মুখ্যমন্ত্ৰী ছিছ’দিয়াক গ্ৰেপ্তাৰ কৰাৰ প্ৰতিবাদ কৰিছে আম আদমী পাৰ্টিয়ে। দিল্লী, বাংগালুৰু, মুম্বাই ইত্যাদি বৃহৎ চহৰসমূহত প্ৰতিবাদৰ জোৱাৰ উঠিছে।
Continue Reading
