পাঁচ মাহৰ পাছত ওলাল কিম জং উনৰ পত্নী

ডিজিটেল ডেস্ক : পাঁচ মাহৰ পাছত সংবাদ মাধ্যমৰ আগত দেখা দিছে উত্তৰ কোৰিয়াৰ নেতা কিম জং উনৰ পত্নী ৰি চোল জু৷ বুধবাৰে প্ৰায় পাঁচ মাহৰ পাছত দেখা গৈছিল ৰি চোল জুক৷ জানিব পৰা মতে, কৰ'না মহামাৰীৰ সময়ত শাসকীয় পৰিয়ালটোৱে সুৰক্ষাৰ স্বাৰ্থতে আতঁৰি থকা বুলি তথ্য প্ৰকাশিত হৈছে৷ চৰকাৰী কেচিএনএ সংবাদ সংস্থাই প্ৰকাশ কৰা তথ্য অনুসৰি কিম আৰু ৰিয়ে ৰাজধানী পিয়ংইয়ংৰ মানচুদাই আৰ্ট থিয়েটাৰত চন্দ্ৰ নৱবৰ্ষৰ বন্ধ উদযাপন কৰি এক কলা প্ৰদৰ্শনত অংশগ্ৰহণ কৰিছিল৷ তেওঁক শেষবাৰৰ বাবে ৯ ছেপ্টেম্বৰত ৰাজহুৱাভাৱে দেখা গৈছিল৷ দেশ প্ৰতিষ্ঠাৰ বাৰ্ষিকীত ৰিয়ে তেওঁৰ স্বামী কিমৰ সৈতে সূৰ্যৰ কুমচুজান প্ৰাসাদ পৰিদৰ্শন কৰিছিল৷ যি স্থানত কিমৰ স্বৰ্গীয় ককাদেউতা আৰু দেউতাকৰ সমাধি আছে। কিম তেওঁৰ পত্নী ৰি চোল জুৰ সৈতে থিয়েটাৰ প্ৰেক্ষাগৃহত উপস্থিত হোৱাৰ সময়তে স্বাগতম সংগীতে বিপুল আদৰণী জনাইছিল দৰ্শকে। উল্লেখ্য যে, কিম আৰু ৰিৰ তিনিটা সন্তান আছে বুলি জানিব পৰা গৈছে যদিও তেওঁলোকৰ বিষয়ে ৰাজহুৱাভাৱে খুব কম জনা যায়।