‘পাপা কী পৰী’ এতিয়াৰে পৰা ‘ৰোহানী দিদি’! নিজৰ ‘তোলনীয়া জীয়েক’ক নতুন নাম দিলে বিতৰ্কিত গুৰু ৰাম ৰহিমে

ডিজিটেল ডেস্কঃ নিজৰ ‘তুলি লোৱা জীয়েক’ক নতুন নাম দিলে গুৰমিত ৰাম ৰহিমে। ধৰ্ষণৰ গোচৰত কাৰাবন্দী হৈ থকা ডেৰা চাছা চৌদাৰ ধৰ্মগুৰুজন বৰ্তমান জামিনত আছে। তাৰ মাজতে বুধবাৰে এই ঘোষণা কৰিছে তেওঁ।

ৰাম ৰহিমৰ তোলনীয়া জীয়েকৰ আচল নাম হৈছে হনীপ্ৰীত। কিন্তু এতিয়াৰে পৰা হনীপ্ৰীতক ‘ৰোহানী দিদি’ নামেৰে জনা যাব।

“আমি তাইক ৰোহানি দিদি নাম দিছো। সহজভাৱে তেওঁক ৰোহ দিদি নামেৰে মাতিব পৰা যাব।”- ৰাম ৰহিমে কয়।

উল্লেখ্য যে ৪১ বৰ্ষীয়া হনীপ্ৰীতে সামাজিক মাধ্যমত নিজকে ‘পাপা কী পৰী’ বুলি আখ্যা দি আহিছে। ৰাম ৰহিমৰ সমানেই হনীপ্ৰীতো বিতৰ্কিত।

ৰাম ৰহিমৰ স’তে সম্পৰ্কক লৈও মাজে মাজে চৰ্চাৰ কেন্দ্ৰবিন্দু হৈ আহিছে হনীপ্ৰীত। তেওঁলোকৰ সম্পৰ্কক অস্বাভাৱিক বুলি আখ্যা দিয়ে বহুতে।

শেহতীয়াকৈ জামিনত মুক্তি লাভ কৰিয়েই ৰাম ৰহিমে এটা মিউজিক ভিডিঅ’ মুকলি কৰিছে। ‘লাভ চাৰ্জাৰ’ নামৰ মিউজিক ভিডিঅ’টোত হনীপ্ৰীতেও অংশ লৈছে।