ডিজিটেল ডেস্কঃ হিন্দুত্ববাদী সংগঠনৰ বাধাৰ পিছতো শ্বাহৰুখ খানৰ 'পাঠান' ছবি খনে মুক্তিৰ প্ৰথম দিনটোতে অভিলেখ সৃষ্টি কৰিলে। ছবি খনৰ এনে জনপ্ৰিয়া দেখি আৰম্ভনিৰে পৰা ছবি খনৰ বিৰুদ্ধে গুজৰি থকা মধ্য প্ৰদেশৰ মন্ত্ৰী নৰোত্তম মিশ্ৰৰ সুৰ সলনি হৈছে।
এটা সময়ত তেঁৱেই প্ৰথমে শ্বাহৰুখ খান আৰু দীপিকা পাডুকন অভিনীত 'পাঠান' সম্পৰ্কে প্ৰশ্ন উত্থাপন কৰিছিল। এতিয়া তেওঁ নিজৰ মত যেন সলনি কৰিছে। তেওঁৰ মতে আৰু প্ৰতিবাদ কৰাৰ কোনো অৰ্থ নাই। কিয়? কাৰণ ইতিমধ্যে চেঞ্চৰ বোৰ্ডৰে ছবি খনত কেঁচি চলাইছেই। ছবিখনৰ কেইবাটাও সংলাপো সলনি কৰা হৈছে।
মধ্য প্ৰদেশৰ মন্ত্ৰীগৰাকীয়ে কয় "মই বিশ্বাস কৰোঁ যে সকলো ধৰণৰ বিতৰ্কিত দৃশ্য সংশোধন কৰা হৈছে। চেঞ্চৰ বোৰ্ডে সকলো ভুল শুধৰাই দিছে । গতিকে আৰু প্ৰতিবাদ কৰাৰ কোনো অৰ্থ নাই। "
ইয়াৰ আগতে নৰোত্তম মিশ্ৰই দাবী কৰিছিল যে 'পাঠান’ ছবি খনে ভাৰতৰ 'পৰম্পৰাগত সংস্কৃতি'ক অপমান কৰিছে। সেয়েহে তেওঁ এই ছবিখন ভাৰতত চলিবলৈ দিব নোৱাৰি বুলি কৈছিল। কিন্তু এতিয়া তেওঁৰ কণ্ঠত আন এটা সুৰ শুনা গৈছে।
উল্লেখ্য ২৫ জানুৱাৰীত 'পাঠান' মুক্তি পোৱাৰ পিছৰে পৰা দৰ্শকৰ মাজত এক উন্মাদনাৰ সৃষ্টি হৈছে। ধুমুহাৰ গতিত বিক্ৰী হৈছে ছবি খনৰ টিকট। ছবি খনে দেশ আৰু বিদেশত দুদিনত ১২৫ কোটিতকৈও অধিক টকা অৰ্জন কৰিছে।
Continue Reading
