ডিজিটেল ডেস্কঃ ২৩ জুনত বিহাৰৰ ৰাজধানী পাটনাত অনুষ্ঠিত হ’বলগীয়া বিৰোধীৰ মেগা বৈঠকৰ সন্দৰ্ভত ইতিমধ্যে বিৰোধী দলৰ নেতা পাটনাত উপস্থিত হোৱাৰ প্ৰক্ৰিয়া আৰম্ভ হৈছে। শুকুৰবাৰে (২৩ জুন) অনুষ্ঠিত হ’বলগীয়া বৈঠকলৈ সমৰ্থন আগবঢ়াইছে জম্মু-কাশ্মীৰৰ প্ৰাক্তন মুখ্যমন্ত্ৰী মেহবুবা মুফতিয়ে।
ইয়াৰ বাহিৰেও বহু নেতাৰ পাটনা পোৱাৰ প্ৰক্ৰিয়া আজিও অব্যাহত হৈ আছে। পশ্চিম বংগৰ মুখ্যমন্ত্ৰী মমতা বেনাৰ্জীয়েও এই বৈঠকৰ বাবে পাটনাত উপস্থিত হৈছে। দিল্লীৰ মুখ্যমন্ত্ৰী অৰবিন্দ কেজৰিৱাল,পঞ্জাৱৰ মুখ্যমন্ত্ৰী ভগৱন্ত মানো আজি নিজেই পাটনাত উপস্থিত হৈছে৷
শুকুৰবাৰে পাটনাত অনুষ্ঠিত হ’বলগীয়া বিৰোধীৰ বৈঠক গঠনমূলক হ’ব বুলি আশাবাদী পশ্চিমবংগৰ মুখ্যমন্ত্ৰী মমতা বেনাৰ্জী। তেওঁ কয় যে দেশখনক ‘বিপৰ্যয়’ৰ পৰা বচাবলৈ পৰৱৰ্তী লোকসভা নিৰ্বাচনত বিজেপিক পৰাস্ত কৰিব লাগিব।
কাইলৈ সভাত উপস্থিত থাকিবলগীয়া নেতাসমূহৰ তালিকা তলত উল্লেখ কৰা হ’ল-
কংগ্ৰেছ নেতা, ৰাহুল গান্ধী
কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খৰ্গে
এন চি পিৰ মুৰব্বী, শাৰদ পাৱাৰ
টিএমচিৰ মুৰব্বী, মমতা বেনাৰ্জী
আপৰ মুৰব্বী অৰবিন্দ কেজৰিৱাল
ডি এম কেৰ মুৰব্বী এম কে ষ্টেলিন
ঝাৰখণ্ড মুক্তি মৰ্চাৰ মুৰব্বী, হেমন্ত সোৰেইন
সমাজবাদী পাৰ্টিৰ মুৰব্বী অখিলেশ যাদৱ
শিৱসেনাৰ মুৰব্বী, উদ্ধৱ থাকৰে
পিডিপিৰ মুৰব্বী, মেহবুবা মুফতি
ৰাষ্ট্ৰীয় সন্মিলনৰ মুৰব্বী,ওমৰ আব্দুল্লা
চি পি আইৰ সাধাৰণ সম্পাদক ডি ৰাজা
চিপিএমৰ মুৰব্বী সীতাৰাম য়েচুৰী
চিপিআই(এমএল)ৰ সাধাৰণ সম্পাদক, দিপাংকৰ ভট্টাচাৰ্য
একে সময়তে এটা সূত্ৰই জনাইছে যে দিল্লীৰ মুখ্যমন্ত্ৰী তথা আম আদমি পাৰ্টিৰ ৰাষ্ট্ৰীয় আহ্বায়ক অৰবিন্দ কেজৰিৱালে বৈঠকত কেন্দ্ৰৰ অধ্যাদেশৰ বিষয়টো উত্থাপন কৰিব। যদিহে কংগ্ৰেছে অধ্যাদেশৰ বিৰুদ্ধে কেজৰিৱালক সমৰ্থন ঘোষণা নকৰে, তেন্তে তেওঁ বৈঠকৰ পৰা ওলাই আহিব পাৰে।
টিএমচিৰ মুখপাত্ৰ ৰিজু দত্তই কয় যে, "দলৰ মুৰব্বী আৰু মুখ্যমন্ত্ৰী মমতা বেনাৰ্জী আৰু সাধাৰণ সম্পাদক অভিষেক বেনাৰ্জীয়ে দেশৰ স্বাৰ্থত আৰু গণতন্ত্ৰ ৰক্ষাৰ বাবে বিৰোধী সভালৈ গৈছে। জাতীয় স্বাৰ্থৰ কথা মনত ৰাখি নিৰ্বাচনত বিজেপিক নিৰ্মূল কৰিব লাগিব।"
বিহাৰৰ মুখ্যমন্ত্ৰী নীতিশ কুমাৰে আহ্বান জনোৱা বিৰোধী বৈঠকৰ বাবে এতিয়া সম্পূৰ্ণ সাজু হৈছে পাটনা। বর্তমান মুখ্যমন্ত্রী আৰু ৰাজ্যসমূহৰ প্রাক্তন মুখ্যমন্ত্রীসকল অতিথিশালাত থাকিব আৰু সভাও এই অতিথিশালাতে অনুষ্ঠিত হ’ব৷ তেওঁলোকৰ লগত অহা লোকসকলৰ বাবে পাটনাৰ বহু হোটেলত থকাৰ ব্যৱস্থা কৰা হৈছে। ইতিমধ্যে বিভিন্ন স্থানত বিৰোধী নেতাৰ পোষ্টাৰ লগোৱা হৈছে।
