ডিজিটেল ডেস্কঃ আগন্তুক ফেব্ৰুৱাৰী মাহটো বলীউডৰ বাবে অতি বিশেষ হ’বলৈ গৈ আছে। ফেব্ৰুৱাৰী মাহতে বি-টাউনৰ অভিনেত্ৰী ৰাকুল প্ৰীত সিং বিবাহপাশত আবদ্ধ হ’বলৈ ওলাইছে।
চলচ্চিত্ৰ প্ৰযোজক তথা অভিনেতা জেকী ভগনানীৰ সৈতে যুগ্ম জীৱন আৰম্ভ কৰিবলৈ গৈ আছে ৰাকুলে।শেহতীয়াকৈ খবৰ আহি পৰিছে যে এইহাল দম্পতীৰ বিয়াৰ স্থান শেষ মুহূৰ্তত সলনি কৰা হৈছে, যাৰ কাৰণ দেশৰ প্ৰধানমন্ত্ৰীৰ বাহিৰে আন কোনো নহয় বুলি চৰ্চা চলিছে।
বলীউডত ৰকুল প্ৰীত আৰু জেকী ভগনানীক লৈ দীৰ্ঘদিন ধৰি চৰ্চা চলি আহিছে। অহা মাহত জেকী আৰু ৰাকুলৰ বিয়া হ’ব বুলি কোৱা হৈছে। পিংকভিলাৰ খবৰ অনুসৰি এই যুটিটোৱে যোৱা ৬ মাহ ধৰি তেওঁলোকৰ গ্ৰেণ্ড ৱেডিঙৰ বাবে বৃহৎ প্ৰস্তুতি চলাই আহিছে। এনে পৰিস্থিতিত ৰাকুল আৰু জেকীয়ে মধ্যপ্ৰাচ্যত বিবাহ অনুষ্ঠান আয়োজন কৰাৰ পৰিকল্পনা কৰিছিল।
কিন্তু বিয়াৰ কেইদিনমান পূৰ্বে বিবাহৰ স্থানৰ পৰিৱৰ্তন ঘটিছিল আৰু এতিয়া এই বিয়াখন ভাৰতৰ গোৱাত অনুষ্ঠিত হ’ব।দৰাচলতে কোৱা হৈছে যে প্ৰধানমন্ত্ৰী নৰেন্দ্ৰ মোদীৰ আবেদনৰ পাছত এই যুটিটোৱে বিয়াৰ স্থান সলনি কৰিছে। শেহতীয়াকৈ প্ৰধানমন্ত্ৰী মোদীয়ে দেশৰ ধনী শ্ৰেণীক দেশৰ বাহিৰত নহয় দেশৰ ভিতৰতে নিজৰ পৰিয়ালৰ বিবাহ অনুষ্ঠান আয়োজন কৰিবলৈ আহ্বান জনাইছিল।
এনে পৰিস্থিতিত দেশৰ প্ৰধানমন্ত্ৰীৰ এই আৱেদনৰ দ্বাৰা ৰাকুল প্ৰীত আৰু জেকী ভগনানী প্ৰভাৱিত হৈ গন্তব্য বিবাহৰ স্থান সলনি কৰিছে বুলি বিশ্বাস কৰা হৈছে। উল্লেখযোগ্য যে গত বৰ্ষৰ ২৬ নৱেম্বৰত মন কী বাত খণ্ডত দেশবাসীলৈ এই অনুৰোধ কৰিছিল প্ৰধানমন্ত্ৰীয়ে।
Continue Reading
