ডিজিটেল ডেস্ক: সংসদত প্ৰমাণ অবিহনে প্ৰধানমন্ত্ৰী মোদীৰ বিৰুদ্ধে মন্তব্য কৰা বাবে ৰাহুল গান্ধীৰ বিৰুদ্ধে জাৰি কৰা হৈছে বিশেষাধিকাৰ ভংগৰ জাননী। প্ৰধানমন্ত্ৰী সন্দৰ্ভত আপত্তিজনক মন্তব্য কৰাৰ অভিযোগত কেন্দ্ৰীয় সংসদীয় পৰিক্ৰমা মন্ত্ৰী প্ৰহ্লাদ যোশীয়ে কংগ্ৰেছ নেতা ৰাহুল গান্ধীৰ বিৰুদ্ধে বিশেষাধিকাৰ ভংগৰ অভিযোগ উত্থাপন কৰিছে। মন্ত্ৰীজনে কয় যে প্ৰমাণ অবিহনে প্ৰধানমন্ত্ৰীৰ বিৰুদ্ধে কৰা মন্তব্যৰ বাবে জাননীখন প্ৰদান কৰা হৈছে৷
বিগত কেইদিনমানৰ পৰা বাজেট অধিৱেশনত এজন উদ্যোগপতিক লৈ হোৱা বিতৰ্কক লৈ বাদানুবাদ অব্যাহত আছে। বিৰোধীৰ নিৰন্তৰ প্ৰতিবাদৰ বাবে অধিৱেশন বাৰে বাৰে স্থগিত ৰখা হৈছে। কংগ্ৰেছ নেতা ৰাহুল গান্ধীক বিজেপিৰ ঘনিষ্ঠ উদ্যোগপতিজনৰ বিৰুদ্ধে কালি সংসদত সৰব হৈ পৰা দেখা গৈছিল, যেতিয়া কালি ৰাষ্ট্ৰপতি মুৰ্মুৰ ভাষণৰ সময়ত লোকসভাত বিষয়টো আলোচনা কৰা হৈছিল।
কেৱল এয়াই নহয় তেওঁ সংসদত প্ৰধানমন্ত্ৰী নৰেন্দ্ৰ মোদী আৰু উদ্যোগপতিৰ এখন ছবিও উপস্থাপন কৰিছিল। ৰাহুল গান্ধীয়ে কৈছিল, মানুহে জানিব বিচাৰে যে এই উদ্যোগপতিজনৰ সৈতে নৰেন্দ্ৰ মোদীৰ ‘সম্পৰ্ক’ কি? ৰাহুল গান্ধীয়ে সংসদত প্ৰশ্ন উত্থাপন কৰিছিল যে বিগত কেইবছৰমানত উদ্যোগপতিজনৰ সম্পত্তি কেনেকৈ ইমান ৰকেটগতিত বৃদ্ধি পাইছে? কংগ্ৰেছ নেতাজনে লোকসভাত জানিব বিচাৰিছিল যে বিমান ব্যৱসায়ত নথকা সত্বেও উদ্যোগপতিৰ গোটে কেনেকৈ দেশৰ গুৰুত্বপূৰ্ণ বিমানবন্দৰৰ ৰক্ষণাবেক্ষণৰ দায়িত্ব লাভ কৰিছিল।
ইয়াৰ পাছত শাসকীয় বিজেপিয়ে ৰাহুলৰ মন্তব্যৰ তীব্ৰ বিৰোধিতা কৰিবলৈ আৰম্ভ কৰে। বিজেপিৰ সাংসদসকলে অভিযোগ কৰিছিল যে ৰাহুল গান্ধীয়ে নিৰ্দিষ্ট প্ৰামাণিক তথ্য অবিহনে কেতিয়াও প্ৰধানমন্ত্ৰীৰ বিৰুদ্ধে এনে গুৰুতৰ অভিযোগ উত্থাপন কৰিব নোৱাৰে। তাৰ পাছতেই সংসদত হুলস্থুলীয়া পৰিস্থিতিৰ সৃষ্টি হয়৷
অধিৱেশন আৰম্ভ হোৱাৰ লগে লগে আজি সংসদীয় পৰিক্ৰমা মন্ত্ৰী প্ৰহ্লাদ যোশীয়ে সংসদত ৰাহুল গান্ধীৰ বিষয়টো উত্থাপন কৰে। তেওঁ দাবী কৰিছিল যে প্ৰমাণ অবিহনে প্ৰধানমন্ত্ৰী নৰেন্দ্ৰ মোদীৰ বিৰুদ্ধে এনে গুৰুতৰ অভিযোগ উত্থাপন কৰাৰ বাবে কংগ্ৰেছ নেতা ৰাহুল গান্ধীৰ বিৰুদ্ধে বিশেষাধিকাৰ ভংগৰ জাননী জাৰি কৰা হ’ব।
তেওঁ লোকসভাৰ অধ্যক্ষ ওম বিৰলাক কয়, সংসদীয় নিয়ম অনুসৰি কোনো সাংসদে আগতীয়াকৈ জাননী জাৰি নকৰাকৈ কাৰো বিৰুদ্ধে এনে অভিযোগ উত্থাপন কৰিব নোৱাৰে। কালি এজন কংগ্ৰেছ সাংসদে কিছুমান ভিত্তিহীন অভিযোগ উত্থাপন কৰি অধিৱেশনক বিপথে পৰিচালিত কৰিবলৈ চেষ্টা কৰিছিল। তেওঁৰ মন্তব্যবোৰ আঁতৰ কৰিব লাগে আৰু তেওঁক বিশেষাধিকাৰ ভংগৰ অভিযোগ কৰি এখন জাননী প্ৰদান কৰা হৈছিল।
Continue Reading
