ডিজিটেল ডেস্কঃ ভাৰতৰ প্ৰধানমন্ত্ৰীৰ বিশেষ সুৰক্ষা গোটৰ সঞ্চালক অৰুণ কুমাৰ সিনহাৰ দেহাৱসান হৈছে। ১৯৮৮ চনৰ কেৰালা বেটচৰ আই পি এছ বিষয়াজনৰ বুধবাৰে পুৱা মৃত্যু হয়। এছ পি জিৰ এক সূত্ৰৰ মতে, অৰুণ বিগত কেইবছৰ ধৰি কৰ্কট ৰোগত আক্ৰান্ত হৈ আছিল। গুৰুগ্ৰামৰ এখন চিকিৎসালয়ত চিকিৎসাধীন হৈ আছিল। তাতেই শেষ উশাহ ল’লে।
২০১৬ চনত অৰুণে এছ পি জিৰ সঞ্চালক হিচাপে দায়িত্ব লয়। চলিত বৰ্ষৰ ৩০ মে’ত তেওঁৰ কাৰ্যকাল শেষ হোৱাৰ কথা আছিল। কিন্তু তেওঁক আৰু এবছৰৰ বাবে এছ পি জিৰ মুৰব্বী হিচাপে ৰখাৰ সিদ্ধান্ত লোৱা হ’ল।
প্ৰধানমন্ত্ৰী, প্ৰাক্তন প্ৰধানমন্ত্ৰী আৰু তেওঁলোকৰ ঘনিষ্ঠ আত্মীয়ৰ নিৰাপত্তাৰ দায়িত্ব এছপিজিৰ। ১৯৮৫ চনত বিশেষভাৱে প্ৰশিক্ষিত বিষয়াৰে এই এছ পি জি সৃষ্টি কৰা হৈছিল। প্ৰধানমন্ত্ৰীৰ বাসগৃহ সচিবালয়ৰ নিৰাপত্তাৰ দায়িত্বও এছ পি জিৰ। দেশৰ ভিতৰত যিকোনো অনুষ্ঠানতে প্ৰধানমন্ত্ৰীক নিৰাপত্তা প্ৰদান কৰে এছ পি জিৰ বিষয়াসকলে।
Continue Reading
