ডিজিটেল ডেস্কঃ প্ৰেমিকক লগ কৰিবলৈ ডুবাইৰ পৰা বাংগালুৰুলৈ অহা এগৰাকী এয়াৰ হোষ্টেজৰ সন্দেহজনক মৃত্যু। এই ঘটনাত আৰক্ষী নামি পৰিছে তদন্তত। মৃত এয়াৰ হোষ্টেছগৰাকীৰ নাম অৰ্চনা ধীমান। অৰ্চনা ধীমানৰ মৃত্যুৰ সন্দৰ্ভত আৰক্ষীয়ে গ্ৰেপ্তাৰ কৰিছে প্ৰেমিকক। ইয়াৰ সমান্তৰালকৈ তেওঁৰ বিৰুদ্ধে হত্যাৰ গোচৰো ৰুজু হৈছে। প্ৰেমিকৰ নাম আদেশ।
আৰক্ষীয়ে জনোৱা মতে, প্ৰেমিক আদেশে জেৰাত জনাইছে যে দুৰ্ঘটনাৰ নিশা দুয়োজনে সুৰা সেৱন কৰিছিল। সেই সময়তে অৰ্চনা বেলকনিৰ পৰা পিছলি গৈছিল। পাছত তেওঁক ওচৰৰ চিকিৎসালয়লৈ লৈ যোৱা হয় আৰু তাত তেওঁক চিকিৎসকে মৃত বুলি ঘোষণা কৰে।
পেছাত এয়াৰ হোষ্টেছ অৰ্চনা ধীমান দুৰ্ঘটনাৰ চাৰিদিন পূৰ্বে প্ৰেমিক আদেশক লগ কৰিবলৈ আহিছিল। বাংগালুৰুৰ কোৰমংগলাত অৱস্থিত ৰেনুকা ৰেচিডেন্সি ছ’চাইটিৰ এপাৰ্টমেণ্টত বাস কৰিছিল আদেশ। এয়াৰ হোষ্টেছ অৰ্চনা সেই এপাৰ্টমেণ্টটোৰ চতুৰ্থ মহলাৰ পৰা পৰি যোৱাৰ অভিযোগ উঠিছে।
আৰক্ষীয়ে জনোৱা মতে, নিহত এয়াৰহোষ্টেছগৰাকী হিমাচল প্ৰদেশৰ বাসিন্দা আছিল। প্ৰাৰম্ভিক তদন্তত প্ৰকাশ পাইছে যে তেওঁ এটা প্ৰখ্যাত বিমান কোম্পানীত কাম কৰিছিল। প্ৰেমিক আদেশক লগ কৰিবলৈ তেওঁ ডুবাইৰ পৰা আহিছিল। আৰক্ষীয়ে লগতে জনাইছে যে আদেশ মাংগালুৰুৰ বাসিন্দা আৰু বেংগালুৰুৰ এটা চফটৱেৰ কোম্পানীত কাম কৰিছিল। আৰক্ষীয়ে লগতে জনাইছে যে দুয়োৰে মাজত বহু বছৰ ধৰি সম্পৰ্ক আছিল।
আৰক্ষীৰ মতে, শুকুৰবাৰে নিশা যুৱতীগৰাকীয়ে এপাৰ্টমেণ্টৰ চতুৰ্থ মহলাৰ বেলকনিত থিয় হৈ থকা সময়তে অসাৱধানবশতঃ ভৰি পিচলি তলত বাগৰি পৰে।
আৰক্ষীয়ে প্ৰাথমিক তদন্তত যুৱতীগৰাকীৰ মৃত্যু এক দুৰ্ঘটনা বুলি মন্তব্য কৰিলেও এই কথা অস্বীকাৰ কৰে তেওঁৰ মাতৃয়ে। মাতৃয়ে অভিযোগ কৰা মতে, বেলকনিৰ পৰা গতা মাৰি তললৈ পেলাই তেওঁৰ কন্যাক পৰিকল্পতিভাৱে হত্যা কৰিছে প্ৰেমিক যুৱকজনে। আৰক্ষীয়ে ইতিমধ্যে মাতৃৰ এজাহাৰৰ ভিত্তিত এটা গোচৰ ৰুজু কৰি ঘটনাৰ তদন্ত আৰম্ভ কৰিছে।
Continue Reading
