ডিজিটেল ডেস্কঃপ্ৰতিবাদৰ জুইত পেৰু জ্বলি আছে। ৰাষ্ট্ৰপতি দিনা বোলাৰ্টৰ বিৰুদ্ধে হোৱা প্ৰতিবাদত ইতিমধ্যে কমেও ৪২ জন লোকে প্ৰাণ হেৰুৱাইছে। ৰাজধানী লিমাকে ধৰি পেৰুৰ কেইবাখনো চহৰত জৰুৰীকালীন অৱস্থা ঘোষণা কৰা হৈছে। নিৰ্দেশনাসমূহ পৰৱৰ্তী ৩০ দিনৰ বাবে জাৰী কৰা হৈছে। সাধাৰণ মানুহৰ চলাচল, একে ঠাইতে একত্ৰিত হোৱা আদিৰ বিৰুদ্ধে নিষেধাজ্ঞা আৰোপ কৰা হৈছে।
দেশ খনত ডিচেম্বৰৰ আৰম্ভণিতে প্ৰথম চৰকাৰ বিৰোধী গণ আন্দোলন আৰম্ভ হৈছিল। এই সময়ছোৱাত তদানীন্তন ৰাষ্ট্ৰপতি পেদ্ৰো কাষ্টিলোক একাধিক দুৰ্নীতিৰ অভিযোগত বৰ্খাস্তকৰা হৈছিল। তেওঁ এতিয়া কাৰাগাৰতে আছে। তেওঁৰ দুৰ্নীতিৰ অভিযোগসমূহৰ পৰীক্ষণ চলি আছে। বৰ্তমান সমগ্ৰ দেশতে চলি থকা চৰকাৰ বিৰোধী বিদ্ৰোহৰ সৈতেও তেওঁৰ নাম জড়িত হৈ পৰিছে।
কাষ্টিলোৰ সমৰ্থকসকলে নতুনকৈ নিৰ্বাচন অনুষ্ঠিত কৰা আৰু বৰ্তমানৰ ৰাষ্ট্ৰপতি দিনা বোলাৰ্টেক অপসাৰণৰ দাবী প্ৰতিবাদ অব্যাহত ৰাখিছে। ইপিনে ৬০ বছৰীয়া মহিলা ৰাষ্ট্ৰপতি দিনা বোলাৰ্টে কৈছে যে তেওঁ পদত্যাগ নকৰে। এক সাক্ষাৎকাৰত বোল্টে কয়, "কিছুমান হিংসাত্মক, মৌলবাদী লোকে মোৰ পদত্যাগ দাবী কৰিছে। তেওঁলোকে সাধাৰণ মানুহক উত্তেজিত কৰি আহিছে। সমগ্ৰ দেশতে বিশৃংখলতা আৰু ধ্বংসৰ পৰিবেশ সৃষ্টি হৈছে। কিন্তু মই পদত্যাগ নকৰো। পেৰুৰ প্ৰতি মোৰ যথেষ্ট দায়িত্ব আছে। '' যোৱা ২৪ ঘণ্টাত পেৰুত মুঠ ৪২ জন প্ৰতিবাদকাৰীৰ আৰক্ষীৰে হোৱা সংঘৰ্ষত মৃত্যু ঘটিছে।
Continue Reading
