ডিজিটেল ডেস্কঃ অহা ৩ ডিচেম্বৰত প্ৰকাশ পাব ছত্তীশগড়ৰ বিধানসভা নিৰ্বাচনৰ ফলাফল। ইয়াৰ পূৰ্বে এবিপিয়ে চি ভোটাৰৰ সহযোগত এক বৃহৎ এক্সিট পোল চলাইছিল। এগজিট পোলৰ ফলাফলত দেখা গৈছে যে কংগ্ৰেছে ৰাজ্যত অগ্ৰগতি লাভ কৰিছে প্ৰতিদ্বন্দ্বী বিজেপিও বহু পিছ পৰি থকা নাই।
সমীক্ষা অনুসৰি শাসকীয় কংগ্ৰেছে বিধানসভাৰ ৯০খন আসনৰ ভিতৰত ৪১-৫৩খন আসন লাভ কৰিছে। তাৰমানে কংগ্ৰেছে অগ্ৰগতি লাভ কৰিছে যদিও যোৱাবাৰৰ তুলনাত আসনৰ সংখ্যা কমি অহা যেন লাগে। একে সময়তে বিজেপি পিছ পৰি থকা যেন লাগিলেও ২০১৮ চনৰ তুলনাত বিজেপিৰ আসন বৃদ্ধি পোৱা যেন লাগে। ছত্তীশগড়ত বিজেপিয়ে লাভ কৰিব পাৰে ৩৬ৰ পৰা ৪৮খন আসন। আন কিছুমানে ০-৪ খন আসন হেৰুৱাব পাৰে।
উৎস- চি ভোটাৰ
ছত্তীশগড়
মুঠ আসন- ৯০ খন
বিজেপি-৩৬-৪৮
কংগ্ৰেছ-৪১-৫৩
অন্যান্য -০-৪
ভোটৰ অংশীদাৰিত্ব
বিজেপি-৪১%
কংগ্ৰেছ-৪৩%
আন-১৬%
উল্লেখ্য যে ছত্তীশগড়ত ২০১৮ চনত কংগ্ৰেছে ৬৮খন আসন লাভ কৰাৰ বিপৰীতে বিজেপিয়ে ১৫খন আসনত সীমাবদ্ধ আছিল। ৰাজ্যৰ আন আন ৰাজনৈতিক দল জেচিচি (জে)য়ে লাভ কৰিছিল পাঁচখন আসন। অৱশ্যে বৰ্তমান ছত্তীশগড়ত কংগ্ৰেছ বিধায়কৰ সংখ্যা ৭১ জন। এই নিৰ্বাচনত কংগ্ৰেছে ৭৫ খনতকৈ অধিক আসন লাভ কৰিব বুলি দাবী কৰিছে। আনকি মুখ্যমন্ত্ৰী ভূপেশ বাঘেলেও সংবাদ মাধ্যমৰ সৈতে কথা পাতি কৈছে যে কংগ্ৰেছে কেৱল জয়ৰ পুনৰাবৃত্তি কৰাই নহয়, ৭৫ খনতকৈও অধিক আসনও লাভ কৰিব।
এইবাৰ বিধানসভা নিৰ্বাচন দুটা পৰ্যায়ত অনুষ্ঠিত হৈছিল। প্ৰথম পৰ্যায়ত ৭ নৱেম্বৰত আৰু দ্বিতীয় পৰ্যায়ত ১৭ নৱেম্বৰত ভোটগ্ৰহণ অনুষ্ঠিত হয়। প্ৰথম পৰ্যায়ত ২০ খন আসনত ভোটগ্ৰহণ অনুষ্ঠিত হয় তাৰে ১২ খন আসনত নক্সাল প্ৰভাৱিত। যোৱা পৰ্যায়ত ৭০খন আসনত ভোটগ্ৰহণ কৰা হৈছে। ৩ ডিচেম্বৰত ৰাজ্যত ভোটগণনা কৰা হ’ব।
Continue Reading
