প্ৰখ্যাত গজল গায়ক ভূপিন্দৰ সিং আৰু নাই! অসমীয়া গীততো দিছিল সুৰীয়া কণ্ঠ

সোমবাৰে নিশা ঘনিষ্ঠ লোকৰ উপস্থিতিত কণ্ঠশিল্পীগৰাকীৰ শেষ ৰীতি-নীতি সম্পন্ন কৰা হৈছে। তথ্য অনুসৰি, কৰ’নাৰ বাবেই এই সিদ্ধান্ত লোৱা হৈছে। আজি ​​পুৱা ১১.৩০ বজাত ওশিৱাৰা শ্মশানত ভূপিন্দৰ সিঙৰ অন্ত্যেষ্টিক্রিয়া সম্পন্ন কৰা হ’ব। বলীউডৰ বহু বিখ্যাত গীতৰ বাবেই ভূপিন্দৰ সিং জনাজাত। ‘মৌচম’, ‘সত্তে পে সত্তা", ‘আহিস্তা আহিস্তা’, ‘দুৰিয়া’, ‘হাকীকত’ আদি বহুতো চিনেমাৰ গীতত তেওঁ কণ্ঠদান কৰিছিল। ভূপিন্দৰ সিঙক ‘দো দিৱানে শ্বেহাৰ মে’, ‘এক আকেলা ইজ শ্বেহাৰ মে’, ‘থোৰি চি জমিন থোৰা আছমান’, ‘দুনিয়া চুটে য়াৰ না চুটে’ আৰু ‘কৰোগে য়াদ তো’ ‘হোকে মজবুৰ মুঝে’, ‘উচকে বুলা হোগা’, ‘দিল ধূুন্দতা হায়’, ‘দুকি পে দুকি হো’, ‘সত্তে পে সত্তা’ আদি গীতৰ বাবে জনা যায়। ভূপিন্দৰ সিং এজন প্ৰখ্যাত ভাৰতীয় সংগীতজ্ঞ আৰু প্ৰধানকৈ এজন গজল গায়ক আছিল। সৰুতে দেউতাকৰ পৰা গীটাৰ বজাবলৈ শিকিছিল। দিল্লীলৈ অহাৰ পিছত তেওঁ অল ইণ্ডিয়া ৰেডিঅ’ত গায়ক আৰু গীটাৰবাদক হিচাপে কাম কৰিছিল। 

সংগীত সুৰকাৰ মদন মোহনে ১৯৬৪ চনত তেওঁক প্ৰথমটো ডাঙৰ সুবিধা দিছিল। ১৯৪০ চনৰ ৬ ফেব্ৰুৱাৰীত পঞ্জাৱৰ অমৃতসৰত জন্মগ্ৰহণ কৰিছিল ভূপিন্দৰ সিঙে। তেওঁৰ পিতৃ অধ্যাপক নাথা সিঙে আছিল এজন মহান সংগীতজ্ঞ। ১৯৭৮ চনত মুক্তি পোৱা এখন চিনেমাত গুলজাৰে ৰচনা কৰা ‘ৱহ জো চহৰ থা’ গীতটোৰ জৰিয়তে তেওঁ জনপ্ৰিয়তা লাভ কৰে। ১৯৮০ চনত বাংলা গায়িকা মিতালী মুখাৰ্জীৰ সৈতে বিবাহপাশত আবদ্ধ হয় ভূপিন্দৰ সিং। অৱশ্যে দুয়োৰে কোনো সন্তান নাই। মহাৰাষ্ট্ৰৰ উপমুখ্যমন্ত্ৰী দেৱেন্দ্ৰ ফাডনাভিছে কণ্ঠশিল্পীগৰাকীৰ মৃত্যুত গভীৰ শোক প্ৰকাশ কৰিছে। উল্লেখ্য যে ভূপিন্দৰ সিঙে অসমীয়া গীতো গাই থৈ গৈছে। অকণ ছবিত ৰং ৰং নানা ৰং, আমি ভাইটি, ভণ্টি, নয়নমণি ছবিত নয়নমণি,নয়নমণি, মা তুমি খেলিবানে, ঘিট মিট এন্ধাৰ আদি গানত কণ্ঠ দিছিল। প্ৰাগ নিউজৰ ফালৰ পৰা ভূপিন্দৰ সিঙৰ মৃত্যুত জনালো গভীৰ শ্ৰদ্ধাঞ্জলি।