ডিজিটেল ডেস্কঃ প্ৰকৃত বন্ধু কেতিয়াবা গোটেই জীৱনৰ বাবে আৰ্শীবাদ স্বৰূপ হৈ পৰে৷ প্ৰকৃত বন্ধুয়ে দান দিব পাৰে নতুন জীৱনো৷ আৰু সততে শুনিবলৈ পোৱা এনে কথাবোৰকে সঁচা প্ৰমাণ কৰিলে উত্তৰ প্ৰদেশৰ নয়ডাৰ কেইগৰাকীমান বন্ধুয়ে৷
এক ভয়ংকৰ পথ দুৰ্ঘটনাত পতিত হৈ গুৰুতৰভাৱে আহত হৈছিল বি.টেকৰ চূড়ান্ত বৰ্ষৰ ছাত্ৰী ছুইটী। দূৰ্ঘটনাত পতিত ছুইটীক সংকটজনক অৱস্থাত ভৰ্তি কৰোৱা হৈছিল কৈলাশ হাস্পতালত৷ কিন্তু ছুইটীৰ চিকিৎসাৰ ব্যয় বহন কৰিব পৰাকৈ আৰ্থিকভাৱে সবল নাছিল ছুইটীৰ পৰিয়াল৷ কিন্তু ছুইটীৰ সাহস হৈ থিয় হ’ল তেওঁৰ অন্তৰংগ কেইজনমান বন্ধু৷
ছুইটীৰ চিকিৎসাৰ বাবে দিন -ৰাতি একাকাৰ কৰি ধন সংগ্ৰহ কৰাত ব্যস্ত হৈ পৰিল ছুইটীৰ বন্ডা° আশীৰ্বাদ মণি ত্ৰিপাঠী, কৰণ পাণ্ডে, আদৰ্শ সিং, ৰাজ শ্ৰীবাস্তৱ, অনুভৱ যাদৱ, ৰাজমণি, চন্দন সিং, শুভম, আৰু প্ৰতীক৷ সামাজিক মাধ্যমৰ জৰিয়তে তেওঁলোকে ছুইটীৰ বাবে ধন সংগ্ৰহ কৰিবলৈ আৰম্ভ কৰে৷
সেয়ে ৮ যুৱকে মিলি প্ৰথমে কলেজৰ অন্য ছাত্ৰ-ছাত্ৰীৰ সহযোগত এক লাখ টকা যোগাৰ কৰি ছুইটীৰ চিকিৎসা আৰম্ভ কৰে। কিন্তু চিকিৎসকে প্ৰকাশ কৰে যে ছুইটীৰ চিকিৎসাৰ বাবদ প্ৰয়োজন হ’ব প্ৰায় ৩০-৩৫ লাখ টকা।
এনে সময়ত ছুইটীৰ বন্ধু আশীৰ্বাদ মণি ত্ৰিপাঠী, কৰণ পাণ্ডে, আদৰ্শ সিং, ৰাজ শ্ৰীবাস্তৱ, অনুভৱ যাদৱ, ৰাজমণি, চন্দন সিং, শুভম, প্ৰতীকে বান্ধৱীৰ চিকিৎসাৰ ব্যয়ৰ বাবে সহায় লয় সামাজিক মাধ্যমৰ।
ফেচবুক, হোৱাটছএপ, ইনষ্টাগ্ৰাম আদি সামাজিক মাধ্যমত দিনে নিশাই ছুইটীৰ হৈ সহায় বিচাৰি ১০ দিনত ৩০ লাখ টকা সংগ্ৰহ কৰিবলৈ সক্ষম হয় ৮ বন্ধুৱে।
একে সময়তে যুৱক কেইজনৰ বন্ধুত্ব আৰু ছুইটীৰ পৰিয়ালৰ আৰ্থিক দুৰাৱস্থাৰ বিষয়ে জানিব পাৰি আৰক্ষী আয়ুক্ত লক্ষ্মী সিঙে আৰক্ষী বিভাগৰ সহকৰ্মীসকলৰ সৈতে মিলি ১০ লাখ টকা ছুইটীৰ চিকিৎসাৰ বাবে প্ৰদান কৰে।
আনকি ছুইটীৰ বাবে ধন সংগ্ৰহৰ সময়ত বন্ধু কেইজনে মহাবিদ্যালয়ৰ পৰীক্ষাত অৱতীৰ্ণ হ’ব লাগিছিল যদিও একমাত্ৰ বান্ধৱীক জীয়াই তোলাৰ খাতিৰতে তেওঁলোকে পৰীক্ষালৈও ভ্ৰুক্ষেপ কৰা নাছিল।
Continue Reading
