ডিজিটেল ডেস্কঃ লাডাখত চীনৰ সৈতে ভাৰতৰ সংঘাত চলি থকাৰ মাজতে ভাৰতীয় বায়ুসেনাই এইবাৰ সীমান্তত 'প্ৰলয়' শীৰ্ষক সামৰিক অনুশীলন চলোৱাৰ সিদ্ধান্ত লৈছে৷এই অনুশীলনে ভাৰতীয় বায়ুসেনাৰ শক্তি পুনৰ বাৰ প্ৰমাণ কৰিব। উত্তৰ-পূৰ্বাঞ্চলত অনুষ্ঠিত হ'বলগীয়া 'প্ৰলয়' শীৰ্ষক এই নতুন অনুশীলনত ভাৰতীয় বায়ু সেনাৰ সকলো শক্তিশালী অস্ত্ৰ-শস্ত্ৰ লগত লৈ যোৱা হৈছে।
বিশেষ ড্ৰোন গোটেও অনুশীলনত ভাগ ল’ব৷ জানিব পৰা মতে ৰাফেল যুদ্ধ বিমানো এই বিশেষ অনুশীলনত থাকিব। এই বছৰ বায়ু সেনাই এনে কমাণ্ড-লেভেল ড্ৰিল আৰম্ভ কৰিবলৈ সিদ্ধান্ত লৈছে বুলি ৰাষ্ট্ৰীয় সংবাদ মাধ্যমত বাতৰি প্ৰকাশ পাইছে৷
উল্লেখ্য চীনৰ সৈতে সীমান্তৰ এটা ডাঙৰ অংশ উত্তৰ-পূৰ্বাঞ্চলত সংলগ্ন হৈ আছে। ভাৰতীয় বায়ু সেনাই সীমান্তৰ এক বৃহৎ এলেকা নিজৰ তত্বাৱধান ৰাখিছে। শ্বিলঙত অৱস্থিত বায়ু সেনাৰ ইষ্টাৰ্ণ কমাণ্ডে চীনৰ গতিবিধিৰ ওপৰত তীক্ষ্ণ নজৰ ৰাখি আহিছে।
বায়ু সেনাৰ এছ-৪০০ যুদ্ধ বিমানে উক্ত অনুশীলনত ভাগ ল’ব বুলিও জানিব পৰা গৈছে৷ ভাৰতীয় বায়ু সেনাই উত্তৰ-পূবৰ ৰাজ্যসমূহক অধিক সুৰক্ষিত ৰাখিবলৈ ছিকিম আৰু শিলিগুৰি কৰিডৰত বিশেষ ড্ৰোন স্কোয়াড্ৰন মোতায়েন কৰিছে বুলিও জানিব পৰা গৈছে৷ উল্লেখ্য চীনে উত্তৰ-পূবৰ অৰুণাচলত প্ৰায়ে আগ্ৰাসন চলাবলৈ চেষ্টা চলাই আছে৷
Continue Reading
