ডিজিটেল ডেস্কঃ আদানী গ্ৰুপে হিণ্ডেনবাৰ্গৰ বিস্ফোৰক প্ৰতিবেদনখনেৰে ভাৰতৰ ওপৰত আক্ৰমণ কৰা বুলি কোৱাৰ পাছতে ইয়াৰ প্ৰত্যুত্তৰ দিছে আমেৰিকা যুক্তৰাষ্ট্ৰৰ গৱেষণা সংস্থাটোৱে। সংস্থাটোৱে কয়- “ভাৰতৰ ভৱিষ্যতক আদানী গ্ৰুপে বন্ধকত ৰাখিছে আৰু দেশৰ পতাকা ব্যৱহাৰ কৰি পদ্ধতিগতভাৱে দেশখনক লুটপাত কৰিছে।’’
আদানী গ্ৰুপে গুৰুত্বপূৰ্ণ বিষয়ৰ পৰা মনোযোগ আঁতৰাই নিবলৈ চেষ্টা কৰিছে বুলি সংস্থাটোৱে অভিযোগ কৰে। কয়- ''আমাৰ প্ৰতিবেদনক লৈ ভাৰতৰ ওপৰত আক্ৰমণ চলোৱা বুলি জাতীয়তাবাদী বাকধাৰা সৃষ্টি কৰা হৈছে।’’
আমেৰিকাৰ প্ৰতিষ্ঠানটোৱে কয় যে, '‘আমি বিশ্বাস কৰোঁ যে এজন প্ৰৱঞ্চক প্ৰৱঞ্চকেই। আনকি যেতিয়া ইয়াক বিশ্বৰ এজন ধনী ব্যক্তিয়ে সংঘটিত কৰে, তেতিয়াও ই প্ৰৱঞ্চনাইয়ে।’’
আনহাতে, ভাৰতৰ গণতন্ত্ৰক প্ৰশংসা কৰি সংস্থাটোৱে কয়- ''স্পষ্ট ক’বলৈ গ’লে আমি বিশ্বাস কৰোঁ যে ভাৰত এখন শক্তিশালী গণতান্ত্ৰিক দেশ আৰু এটা উজ্জল ভৱিষ্যতেৰে ভৰা উদীয়মান মহাশক্তি।’’
উল্লেখ্য যে হিণ্ডেনবাৰ্গৰ ৪১৩ পৃষ্ঠাৰ প্ৰতিবেদনখনত আদানীয়ে জালিয়াতি কৰি বিত্তীয় লাভালাভ উঠোৱা বুলি কোৱা হৈছিল। ইয়াৰ প্ৰত্যুত্তৰত আদানী গ্ৰুপ দেওবাৰে কয় যে ই কেৱল আদানী নহয়, সমগ্ৰ দেশৰ ওপৰতে বাহিৰা শক্তিয়ে কৰা এটা আক্ৰমণ।
Continue Reading
