প্ৰৱঞ্চক সুকেশৰ স’তে সাঙোৰ খোৱাৰ পাছতে ভাৰতৰ পৰা পলাব বিচাৰিছিল জেকুলিন!

ডিজিটেল ডেস্কঃ ভাৰতৰ পৰা পলাব বিচাৰিছিল জেকুলিন ফাৰ্ণাণ্ডেজে! এই চাঞ্ল্যকৰ ভাষ্য আগবঢ়াইছে এনফ’ৰ্চমেণ্ট ডিৰেক্টৰেট, চমুকৈ ইডিয়ে।

দিল্লী আদালতত শনিবাৰে ইডিয়ে জনায় যে ২০০ কোটি টকাৰ অবৈধ বিত্তীয় লেণদেনৰ গোচৰত প্ৰৱঞ্চক সুকেশ চন্দ্ৰশেখৰৰ স’তে সাঙোৰ খোৱাৰ পাছতে জেকুলিনে এই সিদ্ধান্ত লৈছিল।

আদালতে অভিনেত্ৰীগৰাকীৰ এখনি নিয়মীয়া জামিন আবেদনৰ শুনানি আজি গ্ৰহণ কৰিছিল। আদালতে জনোৱামতে, ১০ নৱেম্বৰত এই সংক্ৰা্ন্তত পুনৰ শুনানি গ্ৰহণ কৰা হ’ব।

শুনানিত বলিউডৰ অভিনেত্ৰীগৰাকীৰ জামিন আবেদনৰ বিৰুদ্ধাচাৰণ কৰি ইউিয়ে অভিযোগ কৰে যে অনুসন্ধানকালত জেকুলিনে তেওঁৰ স’তে থকা সন্দেহজনক তথ্যসমূহ নষ্ট কৰিছিল।

তদুপৰি অনুসন্ধানকাৰীসকলৰ স’তে জেকুলিনে সহযোগ নকৰাৰো অভিযোগ তোলে ইডিয়ে। কয় যে জেকুলিনে ভাৰতৰ পৰা পলাই যাব বিচাৰিছিল।

উল্লেখ্য যে বৰ্তমান দিল্লীত কাৰাগাৰত আৱদ্ধ থকা সুকেশ চন্দ্ৰশেখৰৰ বিৰুদ্ধে ২০০ কোটি টকাৰ অবৈধ বিত্তীয় লেনদেনৰ অভিযোগ আছে। অভিযোগ অনুসৰি, সুকেশে অনেক লোকক প্ৰৱঞ্চনা কৰি আহিছে।

জেকুলিন ফাৰ্ণাণ্ডেজৰ উপৰিও সুকেশৰ স’তে সাঙোৰ খাই পৰিছে আন এগৰাকী অভিনেত্ৰী নৰা ফাটেহীও। অভিযোগ অনুসৰি, সুকেশে নৰাক অনেক মূল্যৱান উপহাৰ দিছিল।