ডিজিটেল ডেস্ক: ৰাষ্ট্ৰীয় ৰাজধানী নতুন দিল্লীত শিশুচুৰি চক্ৰৰ বিৰুদ্ধে সক্ৰিয় হৈ পৰিছে চিবিআই৷ হাস্পতালৰ পৰা চুৰি হৈছে ইটোৰ পাছত সিটো নৱজাতক৷ আৰু চুৰি হোৱা নৱজাতক বিক্ৰী হৈছে ৫ লাখকৈ টকাত৷ কেন্দ্ৰীয় অনুসন্ধানকাৰী সংস্থা, চমুকৈ চিবিআই-এ বৃহস্পতিবাৰে দিল্লীৰ একাধিক স্থানত শিশু সৰবৰাহৰ ঘটনাৰ সন্দৰ্ভত তালাচী চলাইছিল৷ আৰু সেই অভিযানতে দিল্লীৰ কেশৱপুৰম অঞ্চলৰ এটা ঘৰৰ পৰা তিনিটা নৱজাতকক উদ্ধাৰ কৰা হৈছে বুলি বিষয়াসকলে সদৰী কৰে। গোচৰটোত কেইবাজনো লোকক গ্ৰেপ্তাৰ কৰা হৈছে।
চিবিআইৰ সূত্ৰ অনুসৰি, মানৱ সৰবৰাহৰ এই ক’লা ব্যৱসায়ত বহু লোক জড়িত হৈ আছে। নৱজাতক শিশুসকলক ক’লা বজাৰত সামগ্ৰী হিচাপে ক্ৰয় আৰু বিক্ৰী কৰা হৈছিল। চিবিআই-এ বৰ্তমান জড়িত সকলো পক্ষক সোধা-পোছা কৰি আছে, যাৰ ভিতৰত আছে শিশু বিক্ৰী কৰা মহিলা আৰু ক্ৰেতা দুগৰাকী।
চিবিআই-এ শনিবাৰে দিল্লীৰ একাধিক স্থানত তালাচী চলাইছিল আৰু ৰাষ্ট্ৰীয় ৰাজধানী অঞ্চলত সাতৰ পৰা আঠটা শিশুৰ সৰবৰাহত জড়িত লোকসকলক গ্ৰেপ্তাৰ কৰিছিল। গ্ৰেপ্তাৰ হোৱাসকলৰ ভিতৰত আছে এখন চিকিৎসালয়ৰ এটা ৱাৰ্ডবয় আৰু আন কেইবাগৰাকীও মহিলা। চিবিআইৰ সূত্ৰ অনুসৰি যোৱামাহত প্ৰায় ১০টা শিশু বিক্ৰী কৰা হৈছিল আৰু মুঠতে গোচৰটোত সাতজন লোকক গ্ৰেপ্তাৰ কৰা হৈছিল।
এয়াও অভিযোগ উঠিছে যে শিশুটোক চিকিৎসালয়ৰ পৰা চুৰি কৰা হৈছিল আৰু বিক্ৰী কৰা হৈছিল। দিল্লীত মানৱ সৰবৰাহকাৰী চক্ৰটো উৎখাত হোৱাৰ পাছত চিবিআইৰ তদন্ত এতিয়া কেইবাখনো ৰাজ্যত চলিব বুলি জানিব পৰা গৈছে৷
Continue Reading
