ডিজিটেল ডেস্ক: প্ৰচণ্ড গ্ৰীষ্মপ্ৰৱাহৰ কবলত পৰিছে দেশৰ বহুকেইখন ৰাজ্য। ৪৩ ডিগ্ৰীপৰ্যন্ত হৈছেগৈ সৰ্বোচ্চ তাপমাত্ৰা। সম্প্ৰতি দেশৰ ১২খন ৰাজ্যত গ্ৰীষ্ম প্ৰৱাহ অৰ্থাৎ ‘লু’ৰ সন্ত্ৰাস চলিছে। উত্তৰ প্ৰদেশ, ৰাজস্থান, মধ্যপ্ৰদেশ, ছত্তীশগড়, বিহাৰ, ঝাৰখণ্ড, অন্ধ্ৰপ্ৰদেশ, কৰ্ণাটক, মহাৰাষ্ট্র, তেলেংগানা, ওড়িশা আৰু পশ্চিমবংগত এতিয়া প্ৰচণ্ড গ্ৰীষ্ম প্ৰৱাহত ত্ৰাহি মধূসুদন জনতাৰ৷
বতৰ বিজ্ঞান বিভাগৰ মতে অনাগত দিনত তাপমাত্ৰা আৰু অধিক বৃদ্ধি পাব এইসমূহ ৰাজ্যত। উত্তৰ ভাৰতত পাৰাস্তম্ভ অতিক্ৰম কৰিছে ৩৫ ডিগ্ৰীৰ সীমা। বতৰ বিজ্ঞান বিভাগৰ তথ্য অনুসৰি অন্ধ্ৰপ্ৰদেশৰ নন্দয়ালত পাৰাস্তম্ভই অতিক্ৰমণ কৰিছে ৪৩.৭ ডিগ্ৰী চেলছিয়াছৰ সীমা। একেদৰে কৰ্ণাটক, ওড়িশা, মহাৰাষ্ট্র আৰু অন্ধ্ৰপ্ৰদেশৰ বহুকেইখন চহৰৰ তাপমাত্ৰা ৰেকৰ্ড কৰা হৈছে ৪৩ ডিগ্ৰী চেলছিয়াছৰ ওপৰত। অব্যাহত থকা প্ৰচণ্ড গ্ৰীষ্ম প্ৰৱাহৰ বাবে এইসমূহ ৰাজ্যত ব্যাহত হৈ পৰিছে স্বাভাৱিক জনজীৱন। ওড়িশা, বিহাৰৰ দৰে ৰাজ্যত প্ৰচণ্ড গৰমৰ বাবেই সলনি কৰা হৈছে বিদ্যালয়ৰ পাঠদানৰ সময়সূচী।
অৱশ্যে বিশেষজ্ঞৰ মতে অহা ১৭ অথবা ১৮ এপ্ৰিলৰ ভিতৰত গ্ৰীষ্ম প্ৰৱাহৰ পৰা কিছু পৰিমাণে সকাহ পাব এই ১২খন ৰাজ্যৰ জনতাই।
ইপিনে, দেশৰ ১২খন ৰাজ্যত গ্ৰীষ্ম প্ৰৱাহ অব্যাহত থকাৰ মাজতে ৰাজস্থান, মধ্যপ্ৰদেশ, কেৰালা, ছিকিম, মেঘালয়, অৰুণাচল আৰু অসমত বৃষ্টিপাতৰ সম্ভাৱনাৰ তথ্য সদৰী কৰিছে বতৰ বিজ্ঞান বিভাগে। তাৰ বিপৰীতে জম্মু–কাশ্মীৰ আৰু হিমাচলৰ বিভিন্ন স্থানত তুষাৰপাতৰ ঘটনা সংঘটিত হোৱাৰ সম্ভাৱনা ব্যক্ত কৰিছে বতৰ বিজ্ঞান বিভাগে।
Continue Reading
