ডিজিটেল ডেস্কঃসতৰ্ক হৈছে এয়াৰ ইণ্ডিয়া কৰ্তৃপক্ষ৷ হয়তো বিমানত নিষিদ্ধ হ'ব পাৰে সুৰাৰ পৰিবেশন ৷ মূলতঃ আন্তঃৰাষ্ট্ৰীয় বিমানত যাত্ৰীক সুৰা পৰিবেশন কৰা হয় যদিও সুৰাই নানান অথন্তৰ ঘটাবলৈ লোৱাত সতৰ্ক হৈছে এয়াৰ ইণ্ডিয়া কৰ্তৃপক্ষ৷শংকৰ মিশ্ৰ নামৰ এগৰাকী যাত্ৰীয়ে নিউয়ৰ্ক-দিল্লীৰ মাজত চলাচল কৰা এয়াৰ ইণ্ডিয়াৰ এখন বিমানত এগৰাকী মহিলা যাত্ৰীৰ ওপৰত প্ৰস্ৰাৱ কৰা ঘটনাই সমগ্ৰ বিশ্বতে চাঞ্চ্যলৰ সৃষ্টি কৰিছে।
এনে ঘটনাৰ প্ৰতিক্ৰিয়াৰ মাজতে এয়াৰ ইণ্ডিয়াৰ মুখ্য কাৰ্যবাহী বিষয়া উইলচন কেম্পবেলে এক বিবৃতিত কৈছে যে এয়াৰলাইনটোৱে প্ৰস্ৰাৱৰ ঘটনাৰ পিছত বিমানত যাত্ৰীসকলক সুৰা পৰিৱেশন কৰাৰ নীতি পৰ্যালোচনা কৰি আছে। শংকৰ মিশ্ৰই এয়াৰলাইনৰ বিমানত নিচাগ্ৰস্ত হৈ এগৰাকী মহিলা সহযাত্ৰীৰ ওপৰত প্ৰস্ৰাৱ কৰাৰ পিছত এই সিদ্ধান্ত লোৱা হৈছে। বিমান সংস্থাটোৱে ঘটনাটো সঠিকভাৱে নিয়ন্ত্ৰণ নকৰাৰ বাবে বিমানখনৰ কৰ্মচাৰী আৰু পাইলটৰ বিৰুদ্ধেও শাস্তিমূলক ব্যৱস্থা গ্ৰহণ কৰা হৈছে বুলি তেওঁ কয়। টাটা-মালিক এয়াৰলাইনৰ মুখ্য কাৰ্যবাহী বিষয়াগৰাকীয়ে ঘটনাটোৰ বাবে যাত্ৰীসকলৰ ওচৰত ক্ষমা বিচৰাৰ লগতে আ তদন্তত সহযোগিতা কৰাৰ প্ৰতিশ্ৰুতি দিছে।
বিবৃতিটোত উইলছন কেম্পবেলে কয়, "এয়াৰ ইণ্ডিয়াৰ বিমানত এজন যাত্ৰীৰ নিন্দনীয় কাৰ্যকলৈ আমি গভীৰভাৱে চিন্তিত। আমি এই অভিজ্ঞতাবোৰৰ বাবে দুঃখিত ।"ইপিনে এয়াৰ ইণ্ডিয়াৰ বিমানত সহযাত্ৰীৰ ওপৰত প্ৰস্ৰাৱ কৰাৰ অভিযোগত অভিযুক্ত শংকৰ মিশ্ৰক অৱশেষত বাংগালুৰুৰ পৰা গ্ৰেপ্তাৰ কৰা হৈছে। শংকৰৰ গ্ৰেপ্তাৰৰ খবৰ দিল্লী আৰক্ষীৰ বিষয়াসকলে আজি প্ৰকাশ কৰিছে। অভিযুক্ত যাত্ৰী শংকৰ মিশ্ৰ আমেৰিকা যুক্তৰাষ্ট্ৰৰ এটা বহুজাতিক বিত্তীয় প্ৰতিষ্ঠানৰ ভাৰতৰ ভাইচ প্ৰচিডেণ্ট আছিল। আমেৰিকা যুক্তৰাষ্ট্ৰৰ কোম্পানীটোৱে তেওঁক কালি চাকৰিৰ পৰা বৰ্খাস্ত কৰিছে।
Continue Reading
