প্ৰসংগঃ কংগ্ৰেছৰ সভাপতি নিৰ্বাচন, কিয় ৰাজস্থান এৰিব বিচৰা নাই অশোক গেহলটে?

আনহাতে, ৰাজস্থান হৈছে কংগ্ৰেছশাসিত দেশৰ বৃহত্তম ৰাজ্য। অশোক গেহলটৰ নেতৃত্বত ৰাজস্থানৰ কংগ্ৰেছ চৰকাৰে বিজেপি দলৰ সুচতুৰ ৰাজনীতিক যথেষ্ট প্ৰত্যাহ্বান জনাই আহিছে। গেহলটৰ এই নেতৃত্বৰ দক্ষতাৰ বাবেই তেওঁক কংগ্ৰেছৰ সভাপতি পদবী গ্ৰহণ কৰিবলৈ ভাৰপ্ৰাপ্ত সভানেত্ৰী ছোনীয়া গান্ধীয়ে আহ্বান জনাই আহিছে। কিন্তু গেহলটে এই লৈ কোনো বিশেষ পদক্ষেপ গ্ৰহণ কৰা নাই। ৰাজনৈতিক পৰ্যবেক্ষকসকলৰ মতে, তেওঁৰ চৰকাৰৰ উপমুখ্যমন্ত্ৰী তথা শচীন পাইলটৰ বাবেই মুখ্যমন্ত্ৰীৰ চকী এৰিব বিচৰা নাই গেহলটে। ইয়াৰ কাৰণ হৈছে পাইলট এগৰাকী যুৱ নেতা হিচাপে প্ৰচুৰ জনপ্ৰিয়তা লাভ কৰি আহিছে। জনপ্ৰিয়তাৰ ক্ষেত্ৰত তেওঁ মুখ্যমন্ত্ৰী গেহলটৰ প্ৰতিদ্বন্দি হৈ পৰা বুলি ক’ব পাৰি। সেয়ে পাইলটৰ গ্ৰহণযোগ্যতা আৰু জনপ্ৰিয়তাই যাতে ৰাজ্যখনৰ ৰাজনীতিত থকা নিজৰ কৰ্তৃত্ব হেৰুৱাই পেলাব নোৱাৰে, সেই লৈ গেহলটে বিশেষ সতৰ্কতা অৱলম্বন কৰি আহিছে।

জানিব পৰা মতে, কংগ্ৰেছৰ এটা শিবিৰে ৰাজস্থানৰ মুখ্যমন্ত্ৰী হিচাপে শচীন পাইলটকে বিবেচনা কৰি আহিছে। ৰাহুল গান্ধীৰো অতি নিকট সম্পৰ্ক আছে পাইলটৰ। কিন্তু গেহলট কংগ্ৰেছৰ সভাপতি হ’লেও পাইলটৰ বাবে মুখ্যমন্ত্ৰীৰ চকী সহজ নহ’ব। কংগ্ৰেছৰ সভাপতি হোৱাৰ পাছত গেহলটে নিজৰ আনুগত্যশীল নেতাকে মুখ্যনন্ত্ৰী চকীত বহোৱাবলৈ চেষ্টা কৰিব বুলি ৰাজনৈতিক পৰ্যবেক্ষকসকলে মতপ্ৰকাশ কৰিছে। তদুপৰি গেহলট এগৰাকী অ’বিচি নেতা। ৰাজস্থানৰ অ’বিচিসকলক বিজেপিয়ে শেহতীয়াকৈ তীব্ৰভাৱে আকৰ্ষিত কৰি আহিছে। কিন্তু গেহলটৰ দৰে জ্যেষ্ঠ নেতাৰ বাবেই বিৰোধী দলটোৰ এই আকৰ্ষণে সফলতা লাভ কৰা নাই বুলিব পাৰি।

উল্লেখযোগ্য যে অশোক গেহলটে শেহতীয়াকৈ গান্ধী পৰিয়ালৰ আনুগত্য প্ৰকাশ কৰি আহিছে। কিন্তু শশী থাৰুৰে কংগ্ৰেছৰ দলীয় সংস্কাৰৰ বিষয়টোক লৈ মাত মাতি আহিছে। শেহতীয়া নিৰ্বাচনসমূহত পৰাজয়ৰ বাবে থাৰুৰে পোনপটীয়াকৈ কংগ্ৰেছৰ নেতৃত্বৰ প্ৰতি আঙুলি তুলিছে।