ডিজিটেল ডেস্ক: আকৌ প্ৰসংগ অসম চুক্তি৷ অসম চুক্তিৰ ৬ নং দফাৰ ৰূপায়ণক লৈ বিধানসভাৰ মজিয়াত চলিল আলোচনা৷ অসম চুক্তি ৰূপায়ণৰ প্ৰতিশ্ৰুতিৰে শাসনলৈ অহা অসম গণ পৰিষদ দলটোৱে দুবাৰকৈ শাসনভাৰ লাভ কৰিও চুক্তি ৰূপায়ণত চূড়ান্তভাৱে ব্যৰ্থ হৈছিল৷ যাৰ বাবেই তদানীন্তন মুখ্যমন্ত্ৰী প্ৰফুল্ল কুমাৰ মহন্ত জবাবদিহি হৈ ৰ’ব অসমীয়া সমাজখনৰ ওচৰত৷
অসম চুক্তিখনকে আত্মা হিচাপে গ্ৰহণ কৰি আঞ্চলিকতাবাদ নিচান কঢ়িওৱা অগপৰ স্বৰূপ ওলাই পৰিছিল কা আন্দোলনৰ সময়ত৷ চুক্তিৰ ৫নং দফাক হত্যা কৰি কা গৃহীত কৰা বিজেপিৰ পক্ষত অৱস্থান কৰিছিল অগপই৷ আৰু অগপৰে মন্ত্ৰী অতুল বৰাৰ হাতত অৰ্পিত হৈছিল অসম চুক্তি ৰূপায়ণৰ দায়িত্ব৷ অসম চুক্তি ৰূপায়ণ বিভাগৰ দায়িত্ব লৈ অতুল বৰাই কেইবালানিও বৈঠক অনুষ্ঠিত কৰিলে৷
আছুৰ সৈতেও বৈঠকত বহিছিল অতুল বৰা৷ আনকি, শ্বহীদ ন্যাসলৈ গৈও আছু নেতৃত্বক সাক্ষাৎ কৰিছিল অতুল বৰাই৷ অসম চুক্তি ৰূপায়ণৰ বাবে কেন্দ্ৰই গঠন কৰি দিছিল সমিতি৷ আৰু সেই সমিতিয়ে দিয়া প্ৰতিবেদন দাঢ়ি-ক'মাসহ কাৰ্যকৰী কৰাৰ প্ৰতিশ্ৰুতি দিছিল কেন্দ্ৰীয় মন্ত্ৰী অমিত শ্বাহে৷ কিন্তু, দাঢ়ি-ক’মাসহ কাৰ্যকৰী কৰাটো দূৰৰ কথা, প্ৰতিবেদন আজিলৈ পেলাই থ'লে কেন্দ্ৰই৷ আৰু অতি দুৰ্ভাগ্যজনকভাৱে এই প্ৰতিবেদনৰ প্ৰতিলিপি নাই মন্ত্ৰী অতুল বৰাৰ হাতত৷
আজি অসম বিধানসভাত অগপ বিধায়ক ৰমেন্দ্ৰ নাৰায়ণ কলিতাৰ প্ৰশ্নৰ উত্তৰত এই কথা স্পষ্ট হৈ পৰে৷ অসম চুক্তি ৰূপায়ণ বিভাগত আজিলৈ দাখিল নহ’ল কাৰ্যকৰীকৰণ কমিটিয়ে দাখিল কৰা প্ৰতিবেদন৷ বিধায়ক ৰমেন্দ্ৰ নাৰায়ণ কলিতাই কৰা এক প্ৰশ্নত মন্ত্ৰী অতুল বৰাৰ বিভাগৰ উত্তৰ বিভাগৰ হাতত আজিলৈ প্ৰতিবেদন দাখিল নোহোৱা বিষয়টো কাৰ্যতঃ স্পষ্ট হৈ পৰিল৷
যদিওৱা প্ৰথমাৱস্থাত কমিটিয়ে কেন্দ্ৰীয় গৃহমন্ত্ৰীৰ হাতত দাখিল কৰিবলৈ দিল্লীলৈ ৰাওনা হৈছিল, কিন্তু, দিল্লীত গৃহমন্ত্ৰীৰ সাক্ষাৎ নাপাই অসমলৈ উভতিছিল কমিটি৷ পৰৱৰ্তী সময়ত সেইসময়ৰ মুখ্যমন্ত্ৰী সোণোৱালক সাক্ষাৎ কৰি প্ৰতিবেদন দাখিল কৰিছিল, কিন্তু, ৰহস্যজনকভাৱে প্ৰতিবেদন ক’পী আজিলৈ হাতত নপৰিল অসম চুক্তি ৰূপায়ণ বিভাগৰ হাতত৷
অসম চুক্তিৰ বিপ্লৱ শৰ্মা আয়োগৰ প্ৰতিবেদন আজিলৈকে অসম চুক্তি ৰূপায়ণ বিভাগলৈকে গৈ নোপোৱাক লৈ প্ৰতিক্ৰিয়া ব্যক্ত কৰে মন্ত্ৰী অতুল বৰায়ো৷ প্ৰতিবেদনখন বিভাগলৈ যাবই লাগিব বুলি কথা নাই বুলি কৈ দায়সৰা মন্তব্য কৰে মন্ত্ৰীগৰাকীয়ে৷ একপ্ৰকাৰ প্ৰতিবেদনখনৰ প্ৰসংগ এৰাই চলিবলৈ চেষ্টা কৰিছে মন্ত্ৰীগৰাকীয়ে৷ তেওঁৰ দিনতে অসম চুক্তিয়ে সফলতা লাভ কৰিব বুলি তেওঁ আশাবাদী৷ তেওঁ আছুৰ সৈতে সুকীয়া সুকীয়াকৈ বৈঠক অনুষ্ঠিত কৰাৰ কথা উল্লেখ কৰি প্ৰতিটো দফাৰ ওপৰত পৰ্যালোচনা কৰা হৈছে বুলি মন্তব্য কৰে৷
Continue Reading
