ডিজিটেল ডেস্কঃ প্ৰথমবাৰৰ বাবে ৰাজহুৱা হ’ল কিম জং উনৰ কন্যাৰ ফটো। উত্তৰ কোৰিয়াৰ একচ্ছত্ৰী শাসকগৰাকীয়ে শুক্ৰবাৰে নিজৰ কন্যাৰ স’তে এটা মিছাইল নিক্ষেপণ কেন্দ্ত একেলগে ফটো উঠে।
ফটোসমূহ উত্তৰ কোৰিয়াৰ চৰকাৰী নিউজ এজেঞ্চি কেচিএনএই ৰাজহুৱা কৰিছে। তাত দেখা গৈছে পিতৃ আৰু কন্যাই মিছাইল নিক্ষেপন কেন্দ্ৰত মধুৰ বাৰ্তালাপত মিলিত হৈছে।
কিম জং উনৰ কন্যাগৰাকীৰ নাম কিম চাও-ৱে বুলি জানিব পৰা গৈছে। কন্যাগৰাকীৰ বয়স ১২-১৩ৰ ভিতৰত হ’ব বুলি সাংবাদিকসকলে জনাইছে।
উল্লেখ্য যে নিজৰ ব্যক্তিগত জীৱনক লৈ উত্তৰ কোৰিয়াৰ একচ্ছত্ৰী শাসকগৰাকীয়ে তীব্ৰ গোপনীয়তা অৱলম্বন কৰি আহিছে। সেয়ে কিম জং উনৰ কন্যাৰ অস্তিত্বক লৈ দীৰ্ঘদিন ধৰি নানা ধৰণৰ গুজৱ চলি আহিছিল। বহুতে উত্তৰ কোৰিয়াৰ একচ্ছত্ৰী শাসকগৰাকীৰ সন্তান নাই বুলি মত প্ৰকাশ কৰি অহাৰ বিপৰীত আন কিছুৱে আছে বুলি কৈছিল।
কিম জং উনৰ কন্যা সম্পৰ্কে ২০১৩ চনত প্ৰথমবাৰ জনা গৈছিল। আমেৰিকান বাস্কেটবল তাৰকা ডেন্নিছ ৰ’ডমেনে নিজৰ উত্তৰ কোৰিয়া ভ্ৰমণকালত কিম জং উনৰ পৰিয়ালৰ স’তে কিছু দিন কটাইছিল।
কিন্তু ইমান দিন গোপনে ৰখাৰ পাছত কিয় কিম জং উনে নিজৰ কন্যাক ৰাজহুৱাভাৱে পৰিচিত কৰিছে, সেই লৈও বিশ্লেষকসকল ব্যস্ত হৈ পৰিছে। তেওঁলোকে প্ৰশ্ন কৰিছে যে কিম জং উনৰ পাছত তেওঁৰ কন্যা হ’ব নেকি দেশখনৰ মুৰব্বী?
