ডিজিটেল ডেস্কঃ শুকুৰবাৰে (২৮ এপ্ৰিল) দিল্লীৰ যন্তৰ মন্তৰত প্ৰতিবাদ সাব্যস্ত কৰা মল্লযুঁজাৰুৰ আৱেদন সন্দৰ্ভত উচ্চতম ন্যায়ালয়ত শুনানি অনুষ্ঠিত হয়। এই সময়ত দিল্লী আৰক্ষীৰ হৈ হাজিৰ হৈ ছলিচিটৰ জেনেৰেল তুষাৰ মেহতাই কয় যে আমি সিদ্ধান্ত লৈছো যে ব্রিজ ভূষণ সিঙৰ বিৰুদ্ধে উত্থাপিত অভিযোগৰ সন্দর্ভত আজি এফআইআৰ ৰুজু কৰা হ’ব৷
ইয়াৰ পিছতে মল্লযুঁজাৰুৰ হৈ উপস্থিত হৈ অধিবক্তা কপিল ছিবালে নিৰাপত্তাৰ দাবী জনায়। লগতে তদন্তৰ বাবে এছটিএফ গঠনৰ বাবে অনুৰোধ জনায়। এই সন্দৰ্ভত ছলিচিটৰ জেনেৰেলে কয় যে এই বিষয়টো দিল্লী আৰক্ষী আয়ুক্তৰ ওপৰত এৰি দিব লাগে।চিবালে কয় যে উচ্চতম ন্যায়ালয়ৰ এগৰাকী প্ৰাক্তন ন্যায়াধীশৰ তত্বাৱধানত তদন্ত কৰিব লাগে। এই সন্দৰ্ভত তুষাৰ মেহতাই কয় যে এতিয়া এই চাহিদা অলপ বেছি। আৰক্ষী আয়ুক্তই দায়িত্বশীল বিষয়া।
মুখ্য ন্যায়াধীশগৰাকীয়ে কয় যে দিল্লী আৰক্ষীয়ে এফআইআৰ পঞ্জীয়নৰ কথা কৈছে। তদন্তৰ বাবে এছটিএফ গঠন কৰাৰ ক্ষেত্ৰত আমি এতিয়া একো কোৱা নাই। তেওঁ কয় যে নাবালক খেলুৱৈৰ ওপৰত বিপদৰ পৰ্যালোচনা কৰাৰ পিছত আৰক্ষী আয়ুক্তই তেওঁক সুৰক্ষা দিব লাগে। আন খেলুৱৈৰ নিৰাপত্তাও পুনৰীক্ষণ কৰিব লাগে। অহা শুকুৰবাৰে পুনৰ শুনানিৰ বাবে উত্থাপন কৰা হ’ব বিষয়টো।
উল্লেখযোগ্য যে ৰেছলিং ফেডাৰেচন অৱ ইণ্ডিয়া (WFI)ৰ সভাপতি তথা বিজেপিৰ সাংসদ ব্রিজভূষণ সিঙৰ বিৰুদ্ধে তেওঁলোকক যৌন নিৰ্যাতন চলোৱাৰ অভিযোগ কৰিছে মল্লযুঁজাৰুসকলে। দেওবাৰৰ পৰা দিল্লীৰ যন্তৰ মন্তৰত বজৰং পুনিয়া, বিনেশ ফোগাটকে ধৰি দেশৰ বহু মল্লযুঁজাৰুয়ে প্ৰতিবাদ সাব্যস্ত কৰিছে। এফ আই আৰ পঞ্জীয়ন হোৱা নাছিল যদিও পূর্বে তেওঁ আৰক্ষীক এজাহাৰ দাখিল কৰিছিল৷
ইয়াৰ পিছত প্ৰতিবাদকাৰী মল্লযুঁজাৰুসকলে উচ্চতম ন্যায়ালয়ত আবেদন দাখিল কৰিছে।
Continue Reading
