ডিজিটেল ডেস্কঃ পেৰুৰ প্ৰাক্তন ৰাষ্ট্ৰপতি পেদ্ৰো কাষ্টিলোৰ তাৎক্ষণিক মুক্তিৰ দাবীত উত্তাল হৈ পৰিছে দেশ খন। প্ৰতিবাদকাৰীসকলে একে সময়তে দেশখনত সাধাৰণ নিৰ্বাচন অনুশ্ঠিত কৰা আৰু সাংবিধানিক সংস্কাৰৰো দাবী তুলিছে। যোৱা ২৪ ঘণ্টাত দেশৰ আৰক্ষী আৰু নিৰাপত্তা বাহিনীৰ সৈতে হোৱা সংঘৰ্ষত ১৭ জন লোক নিহত হৈছে।
দক্ষিণ আমেৰিকাৰ এখন দেশ পেৰু যোৱা মাহৰ পৰা চৰকাৰ বিৰোধী প্ৰতিবাদত উত্তাল হৈ পৰিছে। যোৱা কেইদিনমানত প্ৰতিবাদৰ তীব্ৰতা আৰু অধিক বৃদ্ধি পাইছে। এতিয়ালৈকে প্ৰতিবাদত মুঠ ৩৯ জন লোকৰ মৃত্যু হৈছে। মৃতসকলৰ ভিতৰত দুজন কিশোৰো আছে। আৰক্ষীয়ে জনোৱা অনুসৰি, দেশৰ দক্ষিণ অংশৰ পুনো অঞ্চলৰ তিতিকাকা হ্ৰদৰ পাৰত থকা হুলিয়াকা চহৰৰ পৰিস্থিতি অধিক অৱনতি ঘটিছে। সংঘৰ্ষত ৬৮ জন প্ৰতিবাদকাৰী আহত হৈছে।
প্ৰতিবাদকাৰীসকলৰ মূল দাবী হৈছে প্ৰাক্তন ৰাষ্ট্ৰপতি পেদ্ৰো কাষ্টিলোৰ তাৎক্ষণিক মুক্তি। যোৱা মাহত, পেড্ৰোৰ বিৰুদ্ধে কংগ্ৰেছক অনৈতিকভাৱে নিলম্বন কৰাৰ অভিযোগ উত্থাপিত হৈছিল। তাৰ পিছত তেওঁক গ্ৰেপ্তাৰ কৰা হৈছিল। দিনা বোলুয়াৰ্টে এতিয়া তেওঁৰ ঠাইত দেশখনৰ ৰাষ্ট্ৰপতিৰ আসনত বহিছে। তেওঁ কৈছে যে চৰকাৰে দ্ৰুত নিৰ্বাচন অনুষ্ঠিত কৰিবলৈ প্ৰতিশ্ৰুতিবদ্ধ।
