ডিজিটেল ডেস্ক: ‘বিবাহিত পুৰুষ এজনক তেওঁৰ পত্নীয়ে খং কৰিলে প্ৰতিক্ৰিয়া প্ৰকাশ কৰিব নালাগে৷ আৰু খঙৰ ভমকত প্ৰহাৰ কৰিব নালাগে৷ তেনে কৰাটো কোনো পুৰুষত্ব নহয়৷ সেই খং সহ্য কৰিব পৰাটোহে প্ৰকৃত পুৰুষত্ব৷’— এই অদ্ভুত মন্তব্য লোকসভাৰ এজন সাংসদৰ৷ সততে বিতৰ্কিত মন্তব্যৰে সংবাদ শিৰোনাম দখল কৰি ৰখা আছাদুদ্দিন ওৱেইছিয়ে কৰিছে এই বিশেষ মন্তব্য৷
AIMIMৰ মুৰব্বী আছাদুদ্দিন ওৱেইছিয়ে শনিবাৰে হায়দৰাবাদত এক দলীয় সমাৱেশ সম্বোধন কৰি কয় যে পত্নীৰ খং সহ্য কৰিব নোৱাৰি প্ৰতিক্ৰিয়া প্ৰকাশ কৰাত কোনো পুৰুষত্ব নাই৷
আছাদুদ্দিনে কয়, যেতিয়া আপোনালোকৰ পত্নীয়ে খং কৰে, আপোনালোকে সেয়া সহ্য কৰাটোহে প্ৰকৃত পুৰুষত্ব। যদি আপোনালোক পয়গম্বৰ মহম্মদৰ প্ৰকৃত অনুগামী, তেন্তে মোক কওক যে পয়গম্বৰে কেতিয়াবা তেওঁৰ জীৱনত কোনো মহিলাৰ গাত হাত তুলিছিল নেকি?
ইয়াৰ উপৰি ওৱেইছিয়ে তেওঁৰ ভাষণত লগতে কয় যে ইছলামে মহিলাসকলক আপোনালোকৰ কাপোৰ ধুবলৈ, খাদ্য ৰান্ধি খুৱাবলৈ নিৰ্দেশ দিয়া নাই৷ কোৰাণৰ কোনো ঠাইত লিখা নাই যে আপোনালোকৰ পত্নীয়ে আপোনালোকৰ কাপোৰ ধুব, আপোনালোকৰ বাবে ৰান্ধিব। দৰাচলতে, ইয়াত কোৱা হৈছে যে স্বামীৰ তেওঁৰ পত্নীৰ উপাৰ্জনত কোনো অধিকাৰ নাই। কিন্তু, পত্নীৰ স্বামীৰ উপাৰ্জনৰ ওপৰত অধিকাৰ আছে৷ কিয়নো তেওঁ ঘৰখন চলাব লাগিব৷
তেওঁ লগতে কয় যে বহুতো স্বামীয়ে প্ৰায়ে তেওঁলোকৰ পত্নীক ৰন্ধাবঢ়া নকৰাৰ বাবে সমালোচনা কৰে বা তেওঁলোকৰ ৰন্ধন দক্ষতাত ত্ৰুটি বিচাৰে।
সেই প্ৰসংগত আছাদুদ্দিনে কয়, মোৰ ভাইসকল, এয়া ইছলাম। এয়া ক’তো লিখা হোৱা নাই। আৰু তাৰ পাছতো এনে কিছুমান লোক আছে, যিয়ে তেওঁলোকৰ পত্নীৰ প্ৰতি নিষ্ঠুৰ ব্যৱহাৰ কৰে৷ এয়া অনুচিত৷
Continue Reading
