ডিজিটেল ডেস্ক: পুনৰ প্ৰশ্নবাণৰ সন্মুখীন গৌতম আদানি৷ আদানিৰ বিত্তীয় কেলেংকাৰীৰ তথ্য ৰাজহুৱা কৰি ‘দ্য ফাইনেন্সিয়েল টাইমছ’ আৰু ‘দ্য গাৰ্ডিয়ান’এ প্ৰতিবেদন প্ৰকাশ কৰাৰ পাছত দেশজুৰি সৃষ্টি হৈছে ধুমুহাৰ৷ ‘ইণ্ডিয়া’ৰ বৈঠকৰ মাজতে কংগ্ৰেছ সাংসদ ৰাহুল গান্ধীয়ে সংবাদমেল সম্বোধন কৰি পুনৰ সমালোচনাৰ মেজলৈ তুলি আনিলে প্ৰধানমন্ত্ৰী মোদীক৷
ৰাহুল গান্ধীয়ে দাবী জনাই কয় যে প্ৰধানমন্ত্ৰী মোদীয়ে অ’চিচিআৰপিৰ দ্বাৰা আগবঢ়োৱা আদানি গোটৰ বিৰুদ্ধে নতুন অভিযোগৰ সৈতে তেওঁৰ নাম জড়িত হোৱা বিষয়টোক লৈ স্থিতি স্পষ্ট কৰিব লাগে আৰু বিষয়টো স্পষ্টভাৱে ব্যাখ্যা কৰিব লাগে৷
কংগ্ৰেছ নেতাজনে দাবী কৰিছিল যে যুটীয়া সংসদীয় সমিতি গঠন কৰি আদানি গোটৰ বিৰুদ্ধে উত্থাপিত অভিযোগৰ তদন্তৰ বাবে পুংখানুপুংখ তদন্ত কৰা উচিত।
ৰাহুল গান্ধীয়ে কয়, মই বুজি পোৱা নাই যে প্ৰধানমন্ত্ৰীয়ে কিয় তদন্তৰ বাবে তৎপৰ হোৱা নাই। তেওঁ কিয় নীৰৱ হৈ আছে? তেওঁ কিয় নকয় যে তেওঁ নিশ্চিত কৰিব যে এই বিষয়টোৰ তদন্ত কৰা হ'ব আৰু দোষী ব্যক্তিক কাৰাগাৰত ৰখা হ'ব? শেহতীয়া প্ৰতিবেদনে জি-২০ নেতাসকল ভাৰতলৈ অহাৰ পূৰ্বে ভাৰতৰ প্ৰধানমন্ত্ৰীৰ ওপৰত সন্মানৰ প্ৰশ্ন হিচাপেও বিবেচিত হৈছে৷
কংগ্ৰেছ নেতা ৰাহুল গান্ধীয়ে আদানি গোটক লক্ষ্য কৰি কয়, বিদেশৰ সংবাদপত্ৰৰ প্ৰতিবেদনত গুৰুতৰ প্ৰশ্ন উত্থাপিত হৈছে। প্ৰথম প্ৰশ্ন, এয়া কাৰ ধন? এইটো আদানি নে আন কাৰোবাৰ? গৌতম আদানিৰ ভাতৃ বিনোদৰ সৈতে দুজন বিদেশী নাগৰিক ইয়াত জড়িত আছে।
দ্বিতীয় প্ৰশ্নটো হ'ল, এই দুজন বিদেশী নাগৰিকক ভাৰতৰ আন্তঃগাঁথনিৰ সৈতে খেলিবলৈ কিয় অনুমতি দিয়া হৈছে? কংগ্ৰেছ নেতা ৰাহুল গান্ধীয়ে আদানি বিষয়ত ছেবিৰ তদন্তৰ ওপৰত প্ৰশ্ন উত্থাপন কৰি কয়, ছেবিৰ দ্বাৰা ইয়াৰ তদন্ত হৈছিল আৰু ক্লিনশ্বীট দিয়া হৈছিল। ক্লিনশ্বীট দিয়া ব্যক্তিজন এতিয়া এনডিটিভিৰ এজন পৰিচালক।
গান্ধীয়ে লগতে কয়, এইটো এটা প্ৰতিষ্ঠানগত নেটৱৰ্কৰ দৰে দেখা গৈছে, য’ত ভাৰতৰ বন্দৰ আৰু বিমানবন্দৰ ক্ৰয় কৰিবলৈ বিদেশী ধন প্ৰয়োগ কৰা হৈছে। প্ৰধানমন্ত্ৰী নৰেন্দ্ৰ মোডী এই বিষয়ত কিয় নীৰৱ? এইক্ষেত্ৰত কোনো সমস্যা নাই নেকি? চিবিআই আৰু ইডিৰ দৰে সংস্থাই ইয়াৰ তদন্ত কৰা নাই কিয়?
Continue Reading
