ডিজিটেল ডেস্ক: গোষ্ঠী সংঘৰ্ষত আকৌ জ্বলিব নেকি মণিপুৰ? আকৌ ব’ব নেকি তেজৰ নৈ? সাময়িক শান্তিৰ পাছত পুনৰ অশান্ত হৈ পৰিছে মণিপুৰ। মণিপুৰৰ ৰাজধানী ইম্ফলৰ পশ্চিম অঞ্চলত সংঘটিত হয় গুলীয়াগুলীৰ ঘটনা।
কুকি অধ্যুষিত কাংকপি অঞ্চলত নিশা সংঘটিত হয় গুলীয়াগুলীৰ ঘটনা। এই ঘটনাত নিহত হয় দুজনকৈ লোক। দুজন লোক নিহত হোৱাৰ উপৰি গুৰুতৰভাৱে আহত হৈছে বহুকেইজন লোক। আৰক্ষীৰ তথ্য অনুসৰি নিশা অঞ্চলটোত অস্ত্ৰধাৰী দুৰ্বৃত্তই চলাই নিৰ্বিচাৰ গুলীচালনা। গুলীচালনাত নিহত লোক দুজন নংথংবাম মিকেলদেৱ আৰু ৱাংখেই মাপাল বুলি চিনাক্ত কৰা হৈছে।
উল্লেখ্য যে নংথংবাম মিকেলদেৱ আছিল অভিযান্ত্ৰিক শিক্ষাৰ ছাত্ৰ। বিগত কেইবামাহে অঞ্চলটোত পহৰাৰ দিয়াৰ দায়িত্বত নিযুক্ত আছিল নংথংবাম মিকেলদেৱ।
ইফালে, ঘটনাত গুৰুতৰভাৱে আহত হৈছে BJYMৰ প্ৰাক্তন সভাপতি বাৰিষ শৰ্মা। আহত বাৰিষ শৰ্মাক ভৰ্তি কৰোৱা হৈছে ইম্ফলৰ এখন চিকিৎসালয়ত। তাৰোপৰি আহত আন দুজনকো ভৰ্তি কৰোৱা হৈছে চিকিৎসালয়ত। ঘটনাৰ পাছতে ঘটনাস্থলীত উপস্থিত হয় শীৰ্ষ আৰক্ষী বিষয়াৰ লগতে সুৰক্ষা বাহিনী।
উল্লেখ্য যে নিশা বৃহৎ অস্ত্ৰ-শস্ত্ৰৰে সজ্জিত কুকি দুষ্কৃতিকাৰী উপস্থিত হৈছিল অঞ্চলটোত। ইয়াৰ পাছতে প্ৰতিৰোধৰ বাবে গাঁওৰক্ষী বাহিনীয়ে গুলীচালনা কৰে দুষ্কৃতিকাৰীৰ ওপৰত। উল্লেখ্য যে শনিবাৰেও অঞ্চলটোত সংঘটিত হৈছিল অনুৰূপ ঘটনা। দুষ্কৃতিকাৰীৰ আক্ৰমণত কাংকপিত নিহত হৈছিল এজন লোক। এইদৰে পুনৰ অশান্ত হৈ পৰে মণিপুৰৰ বিভিন্ন অঞ্চল। বছৰটোৰ প্ৰথমটো দিনতো মণিপুৰত সংঘটিত হৈছিল হিংসাত্মক ঘটনা।
Continue Reading
