ডিজিটেল ডেস্কঃ পুনৰ গোষ্ঠী সংঘৰ্ষত বিধ্বস্ত হৈ পৰিছে মণিপুৰ৷ ইতিহাসৰ পাতত ক’লা আখৰেৰে লিপিবদ্ধ হোৱা মণিপুৰৰ হিংসাই সমগ্ৰ দেশকে জোকাৰি গৈছে। দেশৰ এটা প্ৰান্তীয় অঞ্চল দগ্ধ হৈছে গোষ্ঠী সংঘৰ্ষৰ জুইত৷ মাহৰ পাছত মাহ ধৰি জ্বলি ৰৈছে গোষ্ঠীগত সংঘাতৰ দাবানল৷
বিগত প্ৰায় ৫ মাহ ধৰি হিংসাৰ দাবানলে বিধ্বস্ত কৰা উত্তৰ-পূবৰ ৰাজ্যখনত প্ৰতিদিনেই বিৰাজ কৰিছে আতংকই। মণিপুৰত ঠায়ে ঠায়ে হিংসাৰ জুই জ্বলিয়ে আছে। ছেগা ছোৰোকাকৈ সংঘটিত হৈ আছে এটা সম্প্ৰদায়ৰ আনটো সম্প্ৰদায়ক আক্ৰমণ- প্ৰত্যাক্ৰমণ কৰাৰ ঘটনা। দুটা জনগোষ্ঠীৰ মাজত দপদপাই জ্বলি উঠা জুইকুৰাৰ গ্ৰাসত সোমাই পৰিছে ডেৰশৰো অধিক মানুহ। এই হিংসা-প্ৰতিহিংসাৰ জুইকুৰাৰ লেলিহান শিখাই গ্ৰাস কৰিছে বহু পুৰুষ-নাৰী-শিশু-বৃদ্ধ-বণিতাক।
অগ্নিগৰ্ভা মণিপুৰৰ পৰিস্থিতি পূৰ্বৰ তুলনাত কিছু নিয়ন্ত্ৰিত হৈছিল যদিও নতুন বছৰটোৰ আৰম্ভণিতে পুনৰ সংঘটিত হয় হিংসাত্মক ঘটনা। ফলত ৪ জনকৈ লোকে প্ৰাণ হেৰুৱাইছে। জানিব পৰা মতে সোমবাৰে থাউবাল জিলাৰ লিলং গাঁৱত অচিনাক্ত দুৰ্বৃত্তই স্বয়ংক্ৰিয় অস্ত্ৰৰে নিৰ্বিচাৰ গুলীচালনা কৰে।
ফলত ৪ জন লোক থিতাতে নিহত হয় আৰু কেইবাজনো লোক গুৰুতৰভাৱে আহত হয়। এই ঘটনাৰ পাছতে পুনৰ মণিপুৰৰ ইম্ফল উপত্যকাৰ ৫ খন জিলাত সান্ধ্য আইন বলবৎ কৰা হৈছে। ঘটনা সংঘটিত হোৱাৰ পাছতে মণিপুৰৰ মুখ্যমন্ত্ৰী এন বীৰেন সিঙে সকলো মন্ত্ৰী আৰু দলীয় বিধায়কৰ সৈতেও গুৰুত্বপূৰ্ণ বৈঠকত মিলিত হৈছে।
Continue Reading
