ডিজিটেল ডেস্কঃ ২০২৩ চনত এছিয়া কাপৰ খিতাপ জয় কৰাৰ পিছত টীম ইণ্ডিয়াৰ সদস্যসকলৰ আনন্দে নধৰা হৈছে হিয়া । যোৱা নিশাই বিজয়ৰ অন্তত শ্ৰীলংকা এৰি ভাৰতলৈ উভতি টীম ইণ্ডিয়াৰ দলটো । কিন্তু বিমান বন্দৰ অভিমুখী বাছত উঠাৰ পিছতে অপ্ৰস্তুত হৈ পৰে ভাৰতীয় দলৰ কেপ্টেইন ৰোহিত শৰ্মা। বাছত বহি থাকোতে ৰোহিত শৰ্মাৰ হঠাতে গম পালে তেওঁৰ পাছপোৰ্ট খন লগত নাই।তৎমুহূৰ্ততে তেওঁৰ মনতো পৰিল যে হোটেলতে তেওঁৰ পাছপোৰ্ট খন এৰি থৈ আহিছে।
পিছত যেনিবা আন এজন লোকে হোটেললৈ গৈ ৰোহিতৰ পাছপোৰ্টখন লৈ আহে। ভাৰতীয় দলটোৰ অধিনায়ক ৰোহিত শৰ্মাই বস্তু পাহৰাৰ ঘটনা এয়াই প্ৰথম নহয়। তেওঁ প্ৰায়ে এনেদৰে বস্তু পাহৰি আহে বুলি আনকি বিৰাট কোহলীয়েও কৈছিল।
শেহতীয়া ঘটনাটোৰ পিছত ৰোহিতৰ অনুৰাগীসকলে কোহলীৰ পূৰ্বৰ বক্তব্য মনত পেলাইছে। বিৰাট কোহলীয়ে তেওঁৰ এটা সাক্ষাৎকাৰত কৈছিল যে ৰোহিত শৰ্মাৰ সামগ্ৰী পাহৰি যোৱাৰ অভ্যাস পুৰণি। ৰোহিতৰ ক্ষেত্ৰত শ্ৰীলংকাত একে ধৰণৰ ঘটনাই ঘটিছে। বিৰাট কোহলীয়ে সাক্ষাৎকাৰটোত লগতে কৈছিল যে ৰোহিতে প্ৰায়ে হোটেলত তেওঁৰ আইপেড, ম'বাইল ফোন আৰু পাছপোৰ্ট পাহৰি যায়। এবাৰ তেওঁ হোটেলত তেওঁৰ বিয়াৰ আঙুঠিটোও পাহৰি এৰি থৈ আহিছিল। যদিও প্ৰতিবাৰেই তেওঁ সেইবোৰ ঘূৰাই পাইছে। যোৱা নিশা ৰোহিতৰ পাছপোৰ্ট পোৱাৰ পিছত দলৰ বাছখন বিমানবন্দৰলৈ ৰাওনা হয়।
উল্লেখ্য এছিয়া কাপৰ ফাইনেলত টীম ইণ্ডিয়াই শ্ৰীলংকাৰ বিৰুদ্ধে একপক্ষীয়ভাৱে মেচখন জিকে। খেলখনত মহম্মদ চিৰাজৰ দুৰ্দান্ত বলিঙেৰে ভাৰতে শ্ৰীলংকাক মাত্ৰ ৫০ ৰাণতে পৰাজিত কৰে আৰু অষ্টমবাৰৰ বাবে প্ৰতিযোগিতাখন জিকিবলৈ সক্ষম হয়।
টীম ইণ্ডিয়াৰ অধিনায়ক ৰোহিত শৰ্মাই এছিয়া কাপ ২০২৩ ত ভাল প্ৰদৰ্শন কৰিছে। তেওঁ নেপাল, পাকিস্তান আৰু শ্ৰীলংকাৰ বিৰুদ্ধে খেলত অৰ্ধশতক কৰিছিল। ইয়াৰ উপৰি ৰোহিতে এদিনীয়াত তেওঁৰ ১০,০০০ ৰাণ সম্পূৰ্ণ কৰিবলৈ সক্ষম হৈছে। এই ক্ষেত্ৰত, তেওঁ বিৰাট কোহলীৰ পিছত ভাৰতৰ দ্বিতীয় দ্ৰুততম বেটছমেন হিচাবে পৰিগণিত হৈছে, যিয়ে কম ইনিংছত এই সংখ্যা অতিক্ৰম কৰিবলৈ সক্ষম হৈছে।
Continue Reading
