‘পুষ্পা’ৰ ষ্টাইলত বিজ্ঞাপন কৰি সমালোচিত আল্লু অৰ্জুন, ছবিখন বয়কটৰ বাবে কোনে জনাইছে আহ্বান?

ডিজিটেল ডেস্কঃ সমগ্ৰ বিশ্ব এতিয়া ‘পুষ্পা’ৰ জ্বৰত আক্ৰান্ত। ছবিখনৰ সংলাপ, নৃত্য, গীত সকলো যেন ভাইৰাছৰ দৰে বিয়পি পৰিছে। ক্ৰিকেটাৰ, ফুটবলাৰ, টিকটকাৰৰ পৰা সাধাৰণ লোকেও ‘পুষ্পা’ৰ ‘শ্ৰীবল্লী...’, ‘চামী...’, ‘চাকা চাকা...’ গীতৰ তালে তালে নাচি উঠিছে। বহুতে ‘শ্ৰীবল্লী...’ গীতটোৰ অভিনেতা আল্লু অৰ্জুনৰ নৃত্যশৈলী অনুকৰণ কৰি ছ’চিয়েল মিডিয়াত প্ৰশংসা বুটলিবলৈ সক্ষম হৈছে। অথচ বিপদত পৰিছে অভিনেতা আল্লু অৰ্জুন। ‘পুষ্পা’ৰ ষ্টাইল অনুকৰণ কৰাৰ বাবে এইবাৰ ট্ৰ’লৰ মুখামুখী হৈছে জনপ্ৰিয় অভিনেতাজন। আল্লু অৰ্জুনে অলপতে ভাৰতৰ এটা প্ৰসিদ্ধ খাদ্য বিতৰণ কোম্পানীৰ বিজ্ঞাপনত কাম কৰিছিল, য’ত তেওঁক ‘পুষ্পা’ৰ অৱতাৰত দেখিবলৈ পোৱা গৈছিল। আল্লু অৰ্জুনৰ এই বিজ্ঞাপনটোক লৈয়ে সম্প্ৰতি সামাজিক মাধ্যমত মিশ্ৰিত প্ৰতিক্ৰিয়াৰ সৃষ্টি হোৱা পৰিলক্ষিত হৈছে। অনুৰাগীৰ প্ৰশংসা লাভৰ সমান্তৰালকৈ বিজ্ঞাপনটোক লৈ সমালোচনাও হৈছে। বিজ্ঞাপনটোৰ যোগেদি আল্লু অৰ্জুনে দাক্ষিণাত্যৰ চিনেমাক অপমান কৰা বুলিও অভিযোগ উত্থাপিত হৈছে। বহুতে ‘পুষ্পা’ ছবিখন বয়কট কৰিবলৈও আহ্বান জনাইছে। আনহাতে, আন একাংশই খাদ্য বিতৰণ কোম্পানীৰ এপটো তেওঁলোকৰ স্মাৰ্টফোনৰ পৰা বিলোপ কৰাৰ কথাও সদৰী কৰিছে। অৱশ্যে ইয়াকে লৈ এতিয়াও কোনোধৰণৰ মন্তব্য কৰাৰ পৰা আঁতৰি আছে আল্লু অৰ্জুন। স্মৰ্তব্য যে, পুষ্পা ছবিখনে এতিয়ালৈকে ৪০০ কোটি টকাৰ ব্যৱসায় কৰিছে। ‘পুষ্পা’ৰ দ্বিতীয় খণ্ডৰ কামো ইতিমধ্যে আৰম্ভ হোৱাৰ কথা। প্ৰথম খণ্ডতকৈ দ্বিতীয় খণ্ড আৰু অধিক আকৰ্ষণীয় হ’ব বুলি সদৰী কৰিছে আল্লু অৰ্জুনৰ লগতে ছবি নিৰ্মাতাসকলে।