ডিজিটেল ডেস্কঃ যোৱা মঙলবাৰে সমকামী বিবাহক আইনী স্বীকৃতিৰ বাবে দাখিল কৰা ২০খন আবেদনৰ শুনানি গ্ৰহণ কৰি উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত গঠিত সংবিধান বিচাৰপীঠে এক গুৰুত্বপূৰ্ণ মন্তব্য কৰিছে। ১৮ এপ্ৰিলত শুনানিৰ সময়ত ছলিচিটৰ জেনেৰেল তুষাৰ মেহতাই কেন্দ্ৰৰ হৈ আদালতত কয় যে ‘বিবাহৰ অৰ্থ হ’ল জৈৱিক পুৰুষ আৰু জৈৱিক মহিলাৰ মাজৰ সম্পৰ্ক’। এই কথাত চিজিআই ডি ৱাই চন্দ্ৰচুড়ে কয়, "কেৱল শাৰীৰিক ৰূপেই পুৰুষ আৰু মহিলাৰ ধাৰণাটো ব্যাখ্যা নকৰে। আপোনাৰ যৌনাংগই আপুনি জৈৱিকভাৱে পুৰুষ বুলি সংজ্ঞায়িত নকৰে। ই যথেষ্ট জটিল।"
ইয়াৰ লগতে ছলিচিটৰ জেনেৰেল তুষাৰ মেহতাই কেন্দ্ৰীয় চৰকাৰৰ স্থিতি সংবিধান বিচাৰপীঠৰ সন্মুখত দাখিল কৰে। একে সময়তে জ্যেষ্ঠ অধিবক্তা মুকুল ৰোহাটগীয়ে আদালতত আবেদনকাৰীৰ পক্ষ দাখিল কৰে।
এই বিষয়ত বিতৰ্ক আজি অৰ্থাৎ বুধবাৰেও চলি থাকিব।
সংবিধান বিচাৰপীঠত মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ সঞ্জয় কিষাণ কৌল, ন্যায়াধীশ এছ ৰবীন্দ্ৰ ভাট, ন্যায়াধীশ পি এছ নৰসিংহ আৰু ন্যায়াধীশ হিমা কোহলীয়ে দুয়োপক্ষৰ যুক্তি শুনানি গ্ৰহণ কৰি আছে।
এই শুনানিৰ বিৰোধিতা কৰি কেন্দ্ৰীয় চৰকাৰে কয় যে নতুন সামাজিক সম্পৰ্কৰ সিদ্ধান্ত লোৱাৰ অধিকাৰ কেৱল সংসদেহে আছে। তেওঁ লগতে কয় যে আবেদনকাৰীসকলে এই দেশৰ মতামতক প্ৰতিনিধিত্ব নকৰে।
Continue Reading
