ডিজিটেল ডেস্কঃ সাধাৰণতে নাৰীৰ এটা বিশেষ স্বকীয় ৰূপ আছে বুলি গণ্য কৰা হয়। কিন্তু ইয়াৰ বিপৰীত হৈছে ডাকোটা কুক। পুৰুষৰ দৰেই এখন দাড়িভৰা মুখ আছে আমেৰিকা নিবাসী এই মহিলাগৰাকীৰ। শুনিবলৈ আচৰিত লাগিলেও ই সঁচা।
৩০ বছৰ বয়সীয়া ডাকোটাৰ মুখখন দাড়ি-গোঁফেৰে ভৰা। কিশোৰীকালৰ পৰাই ডাকোটাৰ মুখত দাড়ি দেখা গৈছিল। ১৩ বছৰ বয়সত ডাকোটাই নিজৰ শৰীৰৰ অস্বাভাৱিকতা বুজি উঠিছিল। সেয়ে লোকলজ্জাৰ পৰা বাচিবলৈ নিয়মিতভাৱে এইসমূহ কাটি মুখখন পৰিষ্কাৰ কৰি আহিছিল তেওঁ।
মুখত দাড়ি থকা বাবে তেওঁ ভীষণ মানসিক অশান্তি লাভ কৰিছিল। কিন্তু ২০১৫ চনত এজন বন্ধুৱে ডাকোটাক এটা পৰামৰ্শ দিলে। ক’লে যে এই দাড়িখিনি ডাকোটাই ফেশ্বন শ্ব’ত অংশ ল’লে চৰ্চাৰ কেন্দ্ৰবিন্দু হৈ পৰিব আৰু ডাকোটাৰ বাবে ই গৌৰৱৰ কাৰণো হৈ পৰিব।
শেহতীয়াকৈ ডাকোটাই ইন্ষ্টাগ্ৰামত এখন পুৰণি ছৱি শ্বেয়াৰ কৰিছে। তাত তেওঁ নিউয়ৰ্ক ফেশ্বন উইকত অংশ লোৱা দেখা গৈছে।
ফটোখনৰ স’তে ডাকোটাই লিখিছে যে তেওঁ শৈশৱৰে পৰা নিজৰ শৰীৰক ঘৃণা কৰি আহিছে। তেওঁ কোনোদিনে মডেলিঙত ভৰি থব বুলি ভবা নাছিল। কিন্তু এই নীচ্চাত্মিকতাবোধ এতিয়া শেষ হৈছে। নিজৰ ৰূপক লৈ তেওঁ গৰ্বিত।
কিন্তু কিয় ডাকোটাৰ মুখত পুৰুষৰ দৰে দাড়ি আছে? একাধিক মেডিকেল পৰীক্ষাৰ পাছতো ডাক্তৰসকলে ডাকোটাৰ শাৰিৰীক সমস্যাৰ বিষয়ে বুজিব পৰা নাই। কিছুৱে অনুমান কৰিছে যে শৰীৰত অতিমাত্ৰা টেস্টোস্টেৰণ থকা বাবেই এই অস্বাভাৱিকতাই দেখা দিছে।
