সাৱধান হওক আপুনিও! চীনৰ পাছত এইবাৰ দক্ষিণ কোৰিয়াত ক’ভিডৰ ভয়ংকৰ ৰূপ

ডিজিটেল ডেস্ক: আকৌ ক’ভিড! যেন শেষেই নহ’ব মহামাৰীৰ বিভীষিকা৷ ক’ভিডে নতুনকৈ আতংকৰ সৃষ্টি কৰিছে চীনত৷ চীনৰ পাছত এইবাৰ দক্ষিণ কোৰিয়াত ক’ভিড ভয়াৱহ সংক্ৰমণ দেখিবলৈ পোৱা গৈছে৷ দক্ষিণ কোৰিয়াত এদিনতে অ’মিক্ৰনত আক্ৰান্ত হৈছে অভিলেখসংখ্যক ৪,০০,০০০ লোকৰো অধিক লোক৷ দক্ষিণ কোৰিয়াৰ স্থানীয় সংবাদমাধ্যমৰ মতে, দক্ষিণ কোৰিয়াত শেহতীয়াকৈ চৌবিশ ঘণ্টাত ৪,০০,৭৪১গৰাকী লোক নতুনকৈ সংক্ৰমিত হৈছে৷ যিটো সংখ্যা বিগত বৰ্ষৰ জানুৱাৰীত দেশখনত প্ৰথম ক’ভিড-১৯ সংক্ৰমণৰো অধিক বুলি জানিব পৰা গৈছে৷ শেহতীয়কৈ, নতুন সংক্ৰমণৰ পাছত দক্ষিণ কোৰিয়াৰ মুঠ আক্ৰান্তৰ সংখ্যা ৭,৬২৯,২৭৫লৈ বৃদ্ধি হৈছে৷ সংবাদ সংস্থা এছ’চিয়েটেড প্ৰেছৰ বাতৰি অনুসৰি, মঙলবাৰৰ দিনো দক্ষিণ কোৰিয়াত মহামাৰীৰ আটাইতকৈ ভয়ংকৰ দিন আছিল আৰু ২৪ ঘণ্টাত ২৯৩জন লোকৰ মৃত্যু হৈছিল। খবৰ অনুসৰি, চীনতো ভয়ংকৰ ৰূপ ধাৰণ কৰিছে ক’ভিড-১৯এ৷ শেহতীয়াকৈ চীনৰ কেইবাখনো চহৰত জাৰি কৰা হৈছে সম্পূৰ্ণ লকডাউন৷ চীনত আজিৰ দিনটোত ৩,২৯০গৰাকী লোক নতুনকৈ সংক্ৰমিত হৈছে ক’ভিড-১৯ত৷ সংবাদ সংস্থা এএফপিৰ বাতৰি অনুসৰি, য’ত ২০১৯ৰ শেষৰ ফালে উহানত প্ৰথম কৰ’না ভাইৰাছৰ উদ্ভৱ হৈছিল, সেই চীনত দুবছৰতকৈ অধিক সময় কোনো ক’ভিড সম্পৰ্কীয় মৃত্যুৰ খবৰ আনুষ্ঠানিকভাৱে প্ৰকাশ কৰা হোৱা নাই। ইফালে, ভাইৰাছৰ সংক্ৰমণ নিয়ন্ত্ৰণ কৰাৰ বাবে চীনে চিকিৎসালয়ৰ বিচনা মুকলি কৰাৰ সিদ্ধান্ত লৈছে৷ ক’ভিড-১৯ৰ অ’মিক্ৰন ভেৰিয়েণ্ট চীন আৰু দক্ষিণ কোৰিয়াৰ ক্ষেত্ৰত হোৱা বৃদ্ধিৰ আঁৰত ক’ভিড-১৯ৰ অত্যাধিক ট্ৰেন্সমিচিবল অ’মিক্ৰন প্ৰকাৰটো আছে বুলি কোৱা হয়। এই প্ৰকাৰটোৱে আকৌ এবাৰ মহামাৰীটো নিয়ন্ত্ৰণ কৰিবলৈ চীনৰ 'জিৰো-ক’ভিড' ৰণনীতিৰ বাবে আটাইতকৈ কঠোৰ প্ৰত্যাহ্বান হিচাপে থিয় দিছে৷ ইপিনে, ভাৰতত ২৪ ঘণ্টাত ক’ভিডত নতুনতৈ আক্ৰান্ত হৈছে ২,৮৭৬গৰাকী লোক৷ ইফালে, কেন্দ্ৰই ক’ভিড-১৯ টীকাকৰণ অভিযান বৃদ্ধি কৰিছে৷ আজিৰে পৰা দেশত আৰম্ভ হৈছে ১২-১৪ বছৰ বয়সৰ শিশু, কিশোৰ-কিশোৰীৰ টীকাকৰণ অভিযান৷