ডিজিটেল ডেস্কঃ কোভিড নাই, কোভিড নাই বুলি বহুতৰে মনত ধৰণা হোৱাৰ সময়তে কোভিডৰ জন্মস্থান বুলি ধাৰণা কৰা চীনতেই কোভিডে পুনৰ কালান্তক ৰূপ ধাৰণ কৰিছে। লকডাউন ঘোষণা কৰা হৈছে একাধিক চহৰত। ভাৰতো এতিয়া কোভিড মুক্ত বুলি ক’ব নোৱাৰি।
বিজ্ঞানীসকলে আশংকা কৰা অনুসৰি দীপাৱলীৰ আগতে দেশত পুনৰ কোভিডে সংহাৰী ৰূপ ধাৰণ কৰিব পাৰে। শেহতীয়াকৈ ভাৰতত ওমাইক্ৰনৰ নতুন উপ-প্ৰকাৰ বি.এ.৫.১.৭ আৰু বি.এফ.৭ ধৰা পৰাৰ পিছতে স্বাস্থ্য বিজ্ঞানীসকল অধিক চিন্তিত হৈ পৰিছে।
এই উপ-প্ৰকাৰসমূহ অত্যন্ত সংক্ৰামক বুলি প্ৰমাণিত হৈছে আৰু চীনৰ মঙ্গোলিয়া অঞ্চলৰ পৰা বিয়পি পৰাৰ পিছত অধিক শক্তিশালী হৈ উঠিছে বুলি বিজ্ঞানীসকলে কৈছে। এনে উপ-প্ৰকাৰবোৰে এতিয়া পৃথিৱীৰ আন প্ৰান্ততো বিয়পি পৰিছে আৰু ইয়াৰ ফলতে কোভিড সংক্ৰমণৰ এক নতুন ঢৌ সৃষ্টি হোৱাৰ আশংকা কৰা হৈছে।
শেহতীয়াকৈ গুজৰাট জৈৱ প্ৰযুক্তি গৱেষণা কেন্দ্ৰই ভাৰতত বিএফ.৭-ৰ প্ৰথম সংক্ৰমণৰ ঘটনা চিনাক্ত কৰিছে। ভেকছিনৰ লগতে ৰোগ প্ৰতিৰোধ ক্ষমতাকো হাৰ মনাব পৰা এইবিধ প্ৰজাতিয়ে সেয়ে সংহাৰৰ সৃষ্টি কৰিব পাৰে বুলি আশংকা কৰা হৈছে।
দেশত এতিয়া লকডাউন নাই। কোভিডৰ আন নিষেধাজ্ঞা বোৰো হ্ৰাস কৰা হৈছে । ইয়াৰ ফলতে কোভিডৰ নতু প্ৰজাতিবিধৰ সংক্ৰমণ সহজ হৈ উঠিব পাৰে বুলি বিজ্ঞানীসকলে মত প্ৰকাশ কৰিছে।বিশেষকৈ শিশু, বৃদ্ধ, কৰ্কট ৰোগী, অংগ সংৰোপণ কৰা ৰোগীৰ দৰে দুৰ্বল লোকসকল এইবিধ প্ৰজাতিয়ে সহজে আক্ৰান্ত কৰিব পাৰে বুলি আশংকা কৰা হৈছে।
Continue Reading
