Salman Rushdie: কিয় গোপনে দৃশ্যগ্ৰহণ কৰা হৈছিল তেওঁৰ উপন্যাস আধাৰিত চিনেমাৰ?

এইগৰাকী সাহিত্যকৰ বলীউডত আছে এক বিশেষ স্থান। তেওঁৰ দ্বাৰা ৰচিত উপন্যাসৰ ভিত্তিত বলীউডৰ চিনেমাও নিৰ্মাণ কৰা হৈছে৷ “মিডনাইট চাইল্ড” শীৰ্ষক ছবিখনো তেওঁৰ উপন্যাসৰ ভিত্তিতে নিৰ্মাণ কৰা হৈছিল।  ১৯৮৮ চনত তেওঁ ৰচনা কৰা The Satanic Verses নামৰ উপন্যাসখনে যথেষ্ট বিতৰ্কৰ সৃষ্টি কৰিছিল৷ আনকি কিছু গোড়া মুছলমান সম্প্ৰদায়ৰ লোকে তেওঁৰ প্ৰাণ নাশ কৰাৰো চেষ্টা কৰিছিল৷ কিন্তু বহু কমসংখ্যক লোকেহে জানে যে তেওঁৰ উপন্যাসৰ আধাৰত বলীউডৰ ছবিও নিৰ্মাণ কৰা হৈছে৷ 

১৯৮১ চনত  ছলমান ৰুশ্বডীৰ ৰচনা কৰিছিল এখন প্ৰখ্যাত উপন্যাস যিখনৰ নাম হৈছে - “ দ্য মিডনাইট চাইল্ড” ৷ উপন্যাসখনত দুগৰাকী কিশোৰীৰ জীৱন চিত্ৰিত কৰা হৈছিল৷ কাহিনী অনুসৰি এই কিশোৰী দুগৰাকীৰ জন্ম হৈছিল ১৯৪৭ চনৰ ১৪ আগষ্টৰ মাজ ৰাতি৷ ভাৰত আৰু পাকিস্তানৰ মাজত চলা ৰাজনৈতিক সংঘাতে দুয়োগৰাকী কিশোৰীৰ জীৱনক প্ৰভাৱিত কৰিছিল৷ দুয়ো গৰাকী কিশোৰীৰ জীৱনক  কেন্দ্ৰ কৰিয়েই উপন্যাসখন ৰচনা কৰা হৈছিল৷ এই উপন্যাসখনক লৈয়ে সুদক্ষ পৰিচালক দীপা মেহতাই “মিডনাইট চিল্ড্ৰেন” নামৰ ছবিখন নিৰ্মাণ কৰিছিল৷ ২০১২ চনত এই ছবিখনে মুক্তি লাভ কৰে৷কিন্তু আচৰিত কথা যে, এই ছবিখনৰ চিত্ৰগ্ৰহণ কৰা হৈছিল অতি গোপনভাৱে৷ ভাৰতৰ মুছলমান সম্প্ৰদায়ৰ লোকসকলে প্ৰতিবাদ কৰাৰ আশংকাতেই শ্ৰীলংকাত দৃশ্যগ্ৰহণ কৰা হৈছিল মিডনাইট চিল্ড্ৰেনৰ৷

লেখক ছলমান ৰুশ্বডীৰ বিৰুদ্ধে আয়াতুল্লা খোমেনীয়ে মৃত্যুৰ ফটোৱা জাৰি কৰিছিল৷ তেওঁৰ উপন্যাস The Satanic Verses আছিল হজৰত মহম্মদৰ জীৱনৰ ওপৰত আধাৰিত৷ উপন্যাসখনৰ কিছু অংশত মুছলমান ধৰ্মগুৰু সম্পৰ্কে আপত্তি দৰ্শোৱা হৈছে৷ এই উপন্যাসৰ বাবেই বহু মুছলিম সংগঠনে লেখকজনক হত্যা কৰিবলৈ বহুবাৰ চেষ্টা কৰিছিল৷ 

পৰিচালক অথবা ৰুশ্বডীয়ে আশংকা কৰাৰ দৰেই ভাৰতত তীব্ৰ প্ৰতিবাদ গঢ়ি উঠিছিল মিডনাইট চিল্ড্ৰেনৰ বিৰুদ্ধে৷ ২০১২ চনত প্ৰদৰ্শিত হোৱাৰ পিছতেই  বহু ধৰ্মীয় সংগঠনৰ উপৰিও ভাৰতীয় জাতীয় কংগ্ৰেছ দলে এই ছবিৰ বিৰোধিতা কৰিছিল। কংগ্ৰেছ দলে যুক্তি দিছিল যে এই ছবিখনত ভূতপূৰ্ব প্ৰধানমন্ত্ৰী  ইন্দিৰা গান্ধীৰ ভাৱমূৰ্ত্তি বিনষ্ট কৰাৰ চেষ্টা কৰা হৈছে৷ কংগ্ৰেছ দলৰ প্ৰতিবাদৰ পিছতেই এই ছবিৰ প্ৰদৰ্শন বন্ধ হৈ গৈছিল ৷২০১৩ চনত কিছু দৃশ্যৰ সংশোধন কৰি ছবিখন প্ৰদৰ্শন কৰা হৈছিল যদিও খুব কম লোকৰহে এই ছবিখন চোৱাৰ সৌভাগ্য হৈছিল।