ডিজিটেল ডেস্কঃ সামাজিক মাধ্যমত ব্যাপক ট্ৰলৰ বলি হৈছে ভাৰতৰ মুখ্য ন্যায়াধীশ ডি ৱাই চন্দ্ৰচূড়। মুধ্য ন্যায়াধীশগৰাকীক ট্ৰ’লৰ জৰিয়তে দেশৰ শীৰ্ষ পদবীক অসন্মান কৰা হৈছে। এই অভিযোগ প্ৰকাশ কৰিছে কংগ্ৰেছৰ সাসংদ বিবেক তানখাই।
এই সম্পৰ্কত ৰাষ্ট্ৰপতি দ্ৰৌপদী মুৰ্মুলৈ কংগ্ৰেছ সাংসদজনৰ স’তে বাৰজন বিৰোধী নেতাই এখন পত্ৰ লিখিছে। তেওঁলোকৰ ভিতৰত দিগ্বিজয় সিং আৰু অন্যান্য কংগ্ৰেছ নেতাৰ লগতে আপ, শিৱসেনা আৰু সমাজবাদী পাৰ্টিৰ নেতাও আছে। ৰাষ্ট্ৰপতিগৰাকীক তাৎক্ষণিক ব্যৱস্থা গ্ৰহণ কৰিবলৈ আহ্বান জনাইছে পত্ৰখনত।
পত্ৰখনত দাবী কৰা হৈছে যে চৰকাৰ গঠন আৰু মহাৰাষ্ট্ৰত ৰাজ্যপালৰ ভূমিকাৰ সৈতে সম্পৰ্কিত এটা গুৰুত্বপূৰ্ণ গোচৰৰ সময়ত ‘ট্ৰলিং সেনা’ই মুখ্য ন্যায়াধীশক ট্ৰ’ল কৰা আৰম্ভ কৰিছিল।
বিৰোধী নেতাসকলে অভিযোগ কৰিছে যে এনে এক গুৰুত্বপূৰ্ণ বিচাৰাধীন বিষয়ৰ শুনানিৰ সময়ত মহাৰাষ্ট্ৰ চৰকাৰৰ সমৰ্থনত ট্ৰ’ল কৰা হৈছিল। তেওঁৰ বিৰুদ্ধে ‘অশ্লীল আৰু অশোভনীয়’ শব্দ ব্যৱহাৰ কৰা হৈছে।
জানিব পৰা মতে, মহাৰাষ্ট্ৰ বিধানসভাত অনুষ্ঠিত আস্থা ভোটত ৰাজ্যপাল ভগত সিং কোশিয়াৰীৰ ভূমিকাৰ সম্পৰ্কত শুনানি হৈছিল। তাতেই মুখ্য ন্যায়াধীশৰ বিৰুদ্ধে এনে ধৰণৰ ট্ৰলিঙৰ অভিযোগ উঠিছে।
Continue Reading
