ডিজিটেল ডেস্কঃ লোকসভাৰ পৰা অযোগ্য ঘোষণা হোৱাৰ পিছত কাইলৈ মঙলবাৰে কংগ্ৰেছ নেতা ৰাহুল গান্ধীয়ে নিজৰ সমষ্টি ৱায়ানাড ভ্ৰমণ কৰিব,য’ত ৰাহুল গান্ধীয়ে এটা বৃহৎ ৰোডশ্ব’ অনুষ্ঠিত কৰিব।কংগ্ৰেছে তেওঁক এক উষ্ম আদৰণি জনাই শক্তিৰ প্ৰদৰ্শন কৰি তুলিবলৈ যৎপৰোনাস্তি চেষ্টা কৰিছে।
উল্লেখযোগ্য যে,"মোদী" উপাধি গোচৰত দোষী সাব্যস্ত হোৱা গান্ধীৰ আবেদনৰ শুনানি অহা ১৩ এপ্ৰিলত চুৰাট আদালতত হ’ব।
গুজৰাটৰ চেছন আদালতে জামিনৰ ম্যাদ বৃদ্ধি কৰাৰ বাবে বৰ্তমান তেওঁ জামিনত আছে। ১৩ এপ্ৰিলত এই গোচৰত দোষী সাব্যস্ত হোৱাৰ বিৰুদ্ধে তেওঁৰ আবেদনৰ পৰৱৰ্তী শুনানি গ্ৰহণ কৰিব আদালতে।
২৩ মাৰ্চত চুৰাটৰ নিম্ন আদালতে বিজেপিৰ বিধায়ক পূৰ্ণেশ মোডীয়ে দাখিল কৰা গোচৰত তেওঁক সমগ্ৰ মোদী সম্প্ৰদায়ক বদনাম কৰাৰ বাবে দোষী সাব্যস্ত কৰে। পৰৱৰ্তী সময়ত দোষী সাংসদসকলক লোকসভাৰ সদস্যপদ ৰখাত বাধা প্ৰদান কৰা নিয়মৰ অধীনত প্ৰাক্তন কংগ্ৰেছ সভাপতিগৰাকীক লোকসভাৰ পৰা অযোগ্য ঘোষণা কৰা হয়।
এই অপৰাধৰ বাবে গান্ধীক সৰ্বাধিক ২ বছৰৰ কাৰাদণ্ড দিয়া হৈছিল যদিও এই আদেশৰ বিৰুদ্ধে আবেদন দাখিল কৰিবলৈ ৩০ দিনৰ বাবে শাস্তি স্থগিত ৰখা হৈছিল। যদিহে দোষী সাব্যস্ত হোৱা ৰায় বাতিল নহয় তেন্তে আগন্তুক আঠ বছৰৰ বাবে তেওঁ নিৰ্বাচনত অৱতীৰ্ণ হোৱাৰ পৰা বঞ্চিত হ’ব।
Continue Reading
