ডিজিটেল ডেস্কঃ চুৰাটৰ এখন আদালতে ৰাহুল গান্ধীক মানহানিৰ গোচৰত দুবছৰৰ কাৰাদণ্ড প্ৰদান কৰাৰ পিছতে কালি তেওঁৰ সাংসদ পদ কৰ্তন কৰা হয়৷ ফলত কংগ্ৰেছৰ ছেকেণ্ড-ইন-কমাণ্ড হিচাবে পৰিচিত ৰাহুল গান্ধীৰ দৰমহা বন্ধ কৰি দিয়া হৈছে৷ কেৱল দৰমহাই নহয়, ৰাহুলে হেৰুৱাব আন বহু সা-সুবিধাও৷ ভাৰতৰ সাংসদসকলে মাহিলী দৰমহা হিচাবে প্ৰায় ১ লাখ টকা লাভ কৰে।
তেওঁ সংসদ অঞ্চলৰ বাবে ভাট্টা হিচাপে ৭০,০০০ টকাও লাভ কৰে। কাৰ্যালয় চলোৱাৰ বাবে তেওঁক ৬০,০০০ টকা দিয়া হয়৷ ইয়াৰ ভিতৰত কৰ্মচাৰীৰ দৰমহাৰ বাবে ৪০,০০০ টকা দিয়া আৰু কাৰ্যালয় চলাবলৈ ২০,০০০ টকা দিয়া হয়৷
সৰ্বোপৰি সাংসদসকলে মাহিলী মুঠ ২.৩ লাখ টকা লাভ কৰে। কৰোনা সময়ছোৱাতএই দৰমহা আৰু ভাট্টা প্ৰায় ৬০ শতাংশ হ্ৰাস কৰা হৈছিল। কেৰালাৰ ৱায়ানাডৰ এজন সাংসদ হিচাবে ৰাহুলেও সেই পৰিমাণৰ দৰমহা লাভ কৰি আহিছিল। কিন্তু সাংসদ পদ খাৰিজ হোৱাৰ পিছত ৰাহুল গান্ধীয়ে আৰু দৰমহাৰ ধন হাতেৰে চুব নোৱাৰিব৷ ইয়াৰ পৰিৱৰ্তে কংগ্ৰেছৰ নেতাগৰাকীয়ে সামান্য পৰিমাণৰ পেঞ্চনহে লাভ কৰিব।
২০১৪ চনত সাংসদ হোৱাৰ পিছত ৰাহুলে দিল্লীত এটা বাংলো পাইছিল। তেওঁ ১২ টা তুঘলক লেনৰ এটা বাংলোত বাস কৰে। সাংসদৰ পদ যোৱাৰ পিছত তেওঁ সেই চৰকাৰী ঘৰ এৰিব লাগিব৷ অৱশ্যে কেন্দ্ৰই ঘৰ এৰাৰ বাবে এমাহ আগতে জাননী দিব। বাংলোটোত দুটা টেলিফোন সংযোগ আছে, ১.৫ লাখ বিনামূলীয়া ফোন কলৰ সুবিধা, ৫০,০০০ ইউনিট বিদ্যুৎ আৰু ৪,০০০ কিলোলিটাৰ পানীৰ বিনামূলীয়া সুবিধা আছে৷ ৰাহুলে এতিয়া সেই সকলো বোৰ সুবিধা হেৰুৱাব পাৰে। ইয়াৰ উপৰি তেওঁ সাংসদসকলে লাভ কৰা বিনামূলীয়া ৰে’ল আৰু বিমানৰ টিকটো আৰু লাভ নকৰে বুলি আইনজ্ঞ একাংশই মন্তব্য কৰিছে৷
Continue Reading
