ডিজিটেল ডেস্কঃ শচীন টেণ্ডুলকাৰ বনাম ছাকলাইন মুস্তাক। ক্ৰিকেটৰ ইতিহাসৰ অন্যতম উল্লেখযোগ্য প্ৰতিদ্বন্দী। ভাৰত আৰু পাকিস্তানৰ এই দুগৰাকী ক্ৰিকেটাৰে আগতে ইজনে সিজনক পৰাভূত কৰিবলৈ আপ্ৰাণ চেষ্টা কৰিছিল। ছাকলাইনৰ অফ স্পিন দুছৰাৰ বিৰুদ্ধে শচীনে সংগ্ৰাম কৰিছিল। অৱশ্যে শচীনে ছাকলাইনক বেটেৰে নহয়, এবাৰ শব্দৰ জালেৰে ফান্দত পেলাইছিল। পাকিস্তানৰ প্ৰাক্তন স্পিনাৰগৰাকীয়ে এইধৰণৰ এটা স্মৃতি সোঁৱৰণ কৰিছে।
এটা অনুষ্ঠানত ২৭ বছৰ আগৰ এই ঘটনাটো কৈছে ছাকলাইনে। ১৯৯৬ চনত কানাডাত অনুষ্ঠিত হোৱা চাহাৰা কাপত শচীনে তেওঁক কিদৰে বুৰ্বক কৰি তুলিছিল সেই কাহিনীটো ছাকলাইনে সোৱঁৰণ কৰে। তেওঁ কয়, “মই ভাবিছিলো ক্ৰিজত শচীনে স্থিতি লভাৰ পূৰ্বেই তেওঁক আউট কৰিম। গতিকে মই গৈ তেওঁক স্লেজ কৰিবলৈ ধৰিলো।’’
ছাকলাইনৰ শ্লেজিঙৰ উত্তৰত শচীনে যি কৰিলে তাৰ বাবে ছাকলাইন সাজু নাছিল। শচীনে আগবাঢ়ি আহি ছাকলাইনক ক’লে- ‘তোমাৰ পৰা এনেকুৱা কথা মই আশা কৰা নাছিলো। মই জানো তোমাৰ হৃদয়খন ধুনীয়া। মই ভবা নাছিলো তুমি এই কামটো কৰিবা।’
শচীনৰ কথাত ছাকলাইন বিভ্ৰান্ত হৈ পৰিল। ভাবিবলৈ ধৰিলে যে শচীনক স্লেজিং কৰি ভুল কৰিলে। গতিকে তেওঁ অলপ হতাশ হৈ পৰিছিল। তাৰেই সুযোগ ল’লে শচীনে। পিছৰ কেইটামান অভাৰত বহু ৰান সংগ্ৰহ কৰে ছাকলাইনৰ বলত।
খেলৰ পিছত শচীনৰ কৌশলবোৰ বুজি পালে ছাকলাইনে। তেওঁ ক'লে, "মই একো গম পোৱাৰ আগতেই শচীনৰ হাতখন ক্ৰিজত চেট হৈ গ'ল। তেওঁ মোৰ বলত এটাৰ পিছত এটাকৈ ডাঙৰ শ্বট মাৰি আছিল, আৰু মোৰ এনে লাগিল যেন কোনোবাই মোৰ গালত চৰ মাৰিছে। শচীনে মোক শব্দৰ জালত ধৰিলে। মই কথাটো ধৰিবই পৰা নাছিলো।''
খেল শেষ কৰিও ছাকলাইনে শচীনৰ ওচৰলৈ গৈ তেনেকৈ ক’লে। অৱশ্যে ইয়াৰ উত্তৰত শচীনে একো নক’লে। কেৱল হাঁহিলে। ২৭ বছৰৰ পাছতো সেই স্মৃতি প্ৰাক্তন পাক স্পিনাৰগৰাকীৰ বাবে সতেজ হৈ আছে। শচীনৰ কথাবোৰ পাহৰিব পৰা নাই।
Continue Reading
