ডিজিটেল ডেস্কঃ কাৰ্যালয়ৰ ফাইলৰ দমৰ মাজত এডাল সাপ ওলোৱাৰ কথাই তীব্ৰ আলোড়ণৰ সৃষ্টি কৰিছে উত্তৰ প্ৰদেশত। উত্তৰ প্ৰদেশ শক্তি নিগমৰ সচিবালয়ৰ চতুৰ্থ মহলাত ঘটনা সংঘটিত হৈছে । উত্তৰ প্ৰদেশৰ ৰাজধানী লক্ষ্ণৌৰ শক্তি ভৱনত ফাইলৰ মাজৰ পৰা হঠাতে এডাল সাপ ওলাই আহে।
ইয়াৰ পিছতে কাৰ্যালয়টোত হুৱা-দুৱা লাগে। অৱশ্যে, সাপডাললৈ চাই সেয়া এডাল পোৱালি সাপ যেনেই অনুমান হৈছিল। তাত উপস্থিত থকা কৰ্মচাৰীসকলে লাঠিৰ সহায়ত সাপডাল খেদি পঠিয়াবলৈ চেষ্টা চলায়।
এজন কৰ্মচাৰীয়ে সাপডাল মূৰৰ পিছফালে ধৰি বাহিৰলৈ দলিয়াই দিয়ে। এই ঘটনাৰ মাজতে সাপডালে তাত উপস্থিত থকা এজন কৰ্মচাৰী অমিতোষ কুমাৰক দংশন কৰে।
সাপে দংশন কৰাৰ পিছতে কৰ্মচাৰীজনক লগে লগে স্থানীয় অসামৰিক চিকিৎসালয়লৈ লৈ যোৱা হয় । এই ঘটনাই এতিয়া ৰাজ্য খনত আলোড়ণৰ সৃষ্টি কৰিছে। বহুতে ধাৰণা কৰিছে যে ফাইলৰ দমৰ মাজত থকা নিগনি খাবলৈয়েই সাপডালে তালৈ আহিছিল।
Continue Reading
